131. löggjafarþing — 55. fundur, 10. des. 2004.
Aukatekjur ríkissjóðs.
375. mál
[11:17]
Össur Skarphéðinsson (Sf):
Herra forseti. Þau hrynja í gegnum þingið, frumvörpin sem fela í sér nýja laumuskatta. Hér er verið að greiða atkvæði um frumvarp til laga um aukatekjur ríkissjóðs. Það er verið að hækka álögur á landsmenn um hundruð milljóna. Hérna er ríkisstjórnin líka að nota þessa nýju skattalækkunaraðferð sem felst í því að hækka skattana áður, og þeirri aðferð er helst lýst með aðferð þingskáldsins sem orðaði það svona, með leyfi hæstv. forseta:
Ef ég bara hefði hattinn,
hann ég tæki ofan bráður.
Leiðin til að lækka skattinn
liggur í því að hækka hann áður.
