Hlutafélög.
Frú forseti. Ég þakka hæstv. ráðherra skýr svör. Það kom fram í máli hennar að þetta frumvarp tengist einungis með óbeinum hætti þeirri umfangsmiklu breytingu sem hún er að beita sér fyrir og varðar samruna og breytingar á högum Byggðastofnunar og Iðntæknistofnunar.
Ég kom hér einungis upp til að fá forvitni minni svalað um það hvort þarna væru einhver tengsl í milli. Ef þau hefðu verið sterkari en hæstv. ráðherra skýrði svo skilmerkilega frá þá hefði ég spurt hana hvernig hún hefði smyglað þessu frumvarpi í gegnum þingflokk sjálfstæðismanna. Hann hefur hingað til ekki lagst mjög á sveifina með hæstv. ráðherra í því máli, en hugsanlegt er að hún eigi stuðningsmenn og miklu sterkari og betri annars staðar en í þeim flokki í því máli.