skráning losunar gróðurhúsalofttegunda.
Hæstv. forseti. Ég verð nú að valda hv. þingmanni vonbrigðum með því að segja að ég leyfi mér að halda því fram að Íslendingar hafi gert allt annað en að ganga á undan með góðu fordæmi. Íslendingar hafa verið að nýta vatnsorku sína og eru núna með í byggingu eitthvert ömurlegasta vatnsorkuver sem um getur í Evrópu sem eyðir dýrmætum náttúruperlum og hvetur til atvinnuuppbyggingar sem er ekki í þeim dúr sem samfélögin sem við þeim eiga að taka hefðu þurft á að halda.
Við höfum oft tekið þessa snerru og það er erfitt að ætla sér í stuttu andsvari að súmmera hér eitthvað upp í þeim efnum. En hv. þingmaður verður að sætta sig við að virkjanir á borð við þær sem Kárahnjúkavirkjun sver sig í ætt við eru ekki taldar framleiða endurnýjanlega orku vegna þess að þær valda óafturkræfum umhverfisspjöllum. Það eru einungis virkjanir sem taldar eru ásættanlegar út frá umhverfissjónarmiðum sem heimilt er í raun að telja til þeirra virkjana sem teljast umhverfisvænar eða hægt að státa sig af að séu á einhvern hátt endurnýjanlegar.
En þetta er auðvitað umræða sem við tökum ekki dýpra hér að sinni. Mér finnst að Íslendingar gætu gert svo miklu meira í þessum efnum til að standa við skuldbindingar sínar gagnvart Kyoto-bókuninni og hefðu svo oft haft tækifæri á síðustu árum til að ganga á undan með góðu fordæmi. En það gerðum við ekki. Við fórum á hnjánum til Kyoto, börðumst um á hæl og hnakka til að fá undanþágurnar. Til hvers? Til þess að láta erlendri stóriðju í té endurgjaldslaust.
