Frú forseti. Ég held að ekki sé hægt að skilja við fjáraukalög ársins 2006 öðruvísi en að fara aðeins yfir örfá atriði í því hvernig gengið hefur til. Fyrir ári var spáð hér að viðskiptahallinn yrði 11–12% á þessu ári. Hann reynist líklega núna um 20% af vergri þjóðarframleiðslu. Þá var gert ráð fyrir því að hann næmi einungis 120–130 milljörðum kr. en hann fer sennilega yfir 200, jafnvel í 220 milljarða kr. Vextir eru með því hæsta sem gerist, a.m.k. í Evrópu, og verðbólgan er tvöfalt meiri en spáð var fyrir ári þannig að það er alveg ljóst að þessi mikli efnahagslegi óstöðugleiki sem þessi fjárlög spegla er þjóðinni hættulegur.