málshöfðun gegn ráðherrum.
Virðulegi forseti. Það kom fram hjá hv. flutningsmanni þessarar tillögu að sjálfstæðismenn hefðu skilað auðu í þingmannanefnd vegna þess að þeir komu ekki með sérstaka tillögu. Mig langar til að vita í hverju sú tillaga hefði átt að vera fólgin. Þessir fimm þingmenn ákveða að leggja fram tillögu um að ákæra menn. Fulltrúar Sjálfstæðisflokksins í umræddri nefnd eru ekki sammála því. Það er algerlega fjarstæðukennt að þegar menn vilja ekki vera á einni tillögu þá þurfi þeir að gera aðra tillögu til að rökstyðja af hverju þeir eru ekki á hinni tillögunni. Þetta er bara í stíl við alla þessa vinnu sem þetta varðar og segir nú meira en hvert orð, hv. þm. Eygló Harðardóttir, um skilning hennar á því verkefni sem hér er á ferðinni.
Síðan er það alveg tvennt ólíkt, og það ætti þingmaðurinn að vita, verandi framámaður í sínum flokki, að eitt er pólitísk ábyrgð og annað er refsiábyrgð. Núna er verið að tala um refsiábyrgðina og mikið væri gaman ef þingmaðurinn gæti tekið þátt í þeirri umræðu. (EyH: Ég skal gera það á eftir.)