Virðulegi forseti. Það er nú hressandi að koma aftur í þennan sal. Ég var í nokkra daga í Evrópusambandslandi, Bretlandi, og þar fylgdist ég mikið með fréttum og það væri auðvitað mikil frétt fyrir Breta ef hæstv. utanríkisráðherra mundi útskýra stöðu evrunnar og Evrópusambandsins því að þeir eru í einhverjum fullkomnum misskilningi um þá stöðu í Bretlandi eins og annars staðar í álfunni. Ég ætla að ræða það seinna í dag og ég vona og veit að hæstv. ráðherra verður þá hér til andsvara. Ég vil hins vegar spyrja hann um þrennt.

Í fyrsta lagi. Hv. þm. Björgvin G. Sigurðsson hefur lagt áherslu á það að hægt sé að fara í aðildarviðræður eða kjósa um aðildarviðræður árið 2013. Hvað finnst hæstv. ráðherra um það?

Í þriðja lagi. Það er afskaplega lítið um fríverslun við Kína í þessari skýrslu sem er náttúrlega gríðarlegt hagsmunamál. Hvernig stendur á því og hvenær verður næsti fundur?

Í þriðja lagi. Norðurheimskautsráðið hittist í síðustu viku og eftir því sem ég best veit (Forseti hringir.) verður fastaskrifstofan í Tromsö en ekki í Reykjavík eins og margir héldu. (Forseti hringir.) Kom fram tillaga frá hæstv. utanríkisráðherra á þessum fundi um að (Forseti hringir.) fastaskrifstofan yrði í Reykjavík?