Virðulegi forseti. Það tíðkaðist áður fyrr að skip voru byggð á strönd við fjöruborð en þau voru aldrei sjósett fyrr en búið var að setja byrðinginn á og það var flot í skipinu. Tillögur hæstv. ríkisstjórnar og hæstv. sjávarútvegsráðherra eru fullkomlega vanbúnar. Hæstv. sjávarútvegsráðherra stendur ásamt forsætisráðherra á feysknum kili sem hefur ekkert flot og engan burð. Slíkt mál er ekki boðlegt til umræðu á Alþingi. Þess vegna á ekki að taka það til umræðu eins og stendur, það á að klára eðlilegan undirbúning að byggingu þess skips sem ríkisstjórnin vill setja á flot.