stjórn fiskveiða.
Hæstv. forseti. Ég þakka hæstv. sjávarútvegs- og landbúnaðarráðherra fyrir að bregðast skjótt við óskum um að koma í salinn. Eins og ég tók fram í stuttri ræðu áðan hefur hæstv. sjávarútvegs- og landbúnaðarráðherra verið að mestu viðstaddur þessa umræðu og tekið virkan þátt í henni, einkum framan af. Er það gott og vona ég að hann eigi eftir að vera virkur í umræðunni líka það sem eftir er. Varðandi hæstv. sjávarútvegsráðherra er það auðvitað rétt að málið er á forræði hans.
Hins vegar er ekki óeðlilegt að spurt sé eftir afstöðu leiðtoga ríkisstjórnarflokkanna, hæstv. forsætisráðherra og hæstv. fjármálaráðherra, vegna þess að ljóst er að ekki er fullur stuðningur í ríkisstjórnarflokkunum við frumvarp hæstv. sjávarútvegs- og landbúnaðarráðherra. Hér hefur hver stjórnarþingmaðurinn á fætur öðrum komið upp í ræðustól og gagnrýnt veigamikla þætti í þessum frumvörpum. Því er ekki óeðlilegt að spurt sé: Hver er afstaða forustumanna ríkisstjórnarflokkanna sem (Forseti hringir.) sameiginlega bera ábyrgð á því að þetta mál er flutt?