6.     Er hámark á staðaruppbótunum og hefur ráðuneytið sett sér starfsreglur varðandi þær?
    Í fyrirmæla- og leiðbeiningabók utanríkisþjónustunnar, sem gilt hefur með breytingum undanfarin 40 ár, er að finna reglur um ákvörðun staðaruppbóta. Þær eru reiknaðar í sérhverju tilviki út frá ákveðnum viðmiðum um stöðu, fjölskylduhagi, framfærslukostnað og aðstæður í gistiríki. Staðaruppbætur eru kostnaðargreiðsla sem ætlað er að bæta kostnað sem hlýst af því að flutningsskyldur starfsmaður og fjölskylda hans eru búsett í gistiríki og dveljast langdvölum fjarri heimahögum.

    7.     Hefur ráðuneytið sjúkrasjóð til greiðslu sjúkrakostnaðar íslenskra sendiráðsstarfsmanna erlendis og ef svo er, hver er staða hans og hversu há upphæð er greidd í hann á ári?
    Flutningsskyldir starfsmenn utanríkisþjónustunnar sem fara til starfa í sendiskrifstofum erlendis halda lögheimili sínu hérlendis, eru á launaskrá íslenska ríkisins og greiða skatta á Íslandi lögum samkvæmt. Þeir eru því sjúkratryggðir á Íslandi samkvæmt gildandi lögum um almannatryggingar og sjúkratryggingar. Eins og gefur að skilja hafa þeir vegna dvalar í öðru landi takmarkaða möguleika til að nýta réttindi sín samkvæmt framangreindum lögum á meðan þeir eru við störf erlendis. Þurfi þeir á heilbrigðisþjónustu að halda þurfa þeir oftast að leita til lækna og heilbrigðisstofnana í viðkomandi gistiríki. Þegar gistiríkið er EES- eða EFTA-ríki eiga starfsmenn á grundvelli EES-samningsins og EFTA-samningsins rétt á heilbrigðisþjónustu eftir sömu reglum og gilda almennt um eigin borgara viðkomandi ríkis en í öðrum tilvikum ber utanríkisþjónustan kostnaðinn með þeim takmörkunum sem hér er gerð grein fyrir. Ekki er um eiginlegan sjóð að ræða, heldur eru þessi útgjöld greidd úr ríkissjóði með sama hætti og önnur útgjöld utanríkisþjónustunnar. Greiddur er kostnaður vegna venjulegrar og nauðsynlegrar læknisþjónustu í gistiríki og 80% af kostnaði við lyfseðilsskyld lyf. Þátttaka starfsmanna í þessum kostnaði er föst árleg greiðsla að fjárhæð 24.000 kr. fyrir einstakling og 48.000 kr. fyrir fjölskyldu og 20% af kostnaði við lyfseðilsskyld lyf.
    Auk lækis- og lyfjakostnaðar flutningsskyldra starfsmanna er endurgreiddur á sama hátt læknis- og lyfjakostnaður staðarráðinna starfsmanna sendiskrifstofa í þeim tilvikum að ekki sé viðkomið fullnægjandi sjúkratryggingum öðruvísi.

    8.     Hversu mikið hefur verið greitt úr sjúkrasjóði ráðuneytisins sl. 10 ár, sundurliðað eftir árum?
    Í eftirfarandi töflu er yfirlit yfir nettóútgjöld utanríkisþjónustunnar sl. 10 ár vegna greiðslna læknis- og lyfjakostnaðar starfsmanna sendiskrifstofa erlendis. Eðli málsins samkvæmt geta verið umtalsverðar sveiflur í útgjöldum utanríkisþjónustunnar vegna þessa frá einu ári til annars.