Ferill 669. máls. Aðrar útgáfur af skjalinu: PDF - Word Perfect.
144. löggjafarþing 2014–2015.
Þingskjal 1263 — 669. mál.
2. umræða.
Nefndarálit
um frumvarp til laga um breytingu á lögum um dómstóla, nr. 15/1998,
með síðari breytingum (fjöldi hæstaréttardómara).
Frá allsherjar- og menntamálanefnd.
Nefndin hefur fjallað um málið og fengið á sinn fund Bryndísi Helgadóttur frá innanríkisráðuneyti og Þorstein A. Jónsson frá Hæstarétti Íslands.
Með frumvarpi þessu er lagt til að dómurum í Hæstarétti Íslands verði fjölgað tímabundið úr níu í tíu frá og með 1. september 2015. Heimildin er tímabundin og gert er ráð fyrir að hún falli niður 31. desember 2016.
Fram kom við umfjöllun í nefndinni að enn væri mikið álag á Hæstarétti sökum málafjölda auk þess sem mál væru þyngri í vinnslu en áður. Einnig var bent á að málum sem eiga rætur að rekja til hruns fjármálakerfisins og afleiðinga þess væri ekki enn lokið. Nefndin áréttar að fram kemur í ársskýrslu Hæstaréttar fyrir árið 2014 að skráð ný mál hafa aldrei verið fleiri. Á árinu 2014 fjölgaði skráðum málum um 36 frá árinu áður og eru skráð mál 111 eða 13% fleiri en meðaltal áranna 2008–2013. Einnig hefur kærum í einkamálum fjölgað verulega og eru þær 96 eða 33% fleiri en meðaltal áranna 2008–2013. Í ljósi þessa sem og mikilvægis þess að málshraða sé haldið í viðunandi horfi telur nefndin brýnt að frumvarpið nái fram að ganga.
Nefndin leggur til að frumvarpið verði samþykkt óbreytt.
Alþingi, 5. maí 2015.
Unnur Brá Konráðsdóttir, form., frsm. |
Páll Valur Björnsson. | Líneik Anna Sævarsdóttir. |
Elsa Lára Arnardóttir. | Guðbjartur Hannesson. | Helgi Hrafn Gunnarsson. |
Anna María Elíasdóttir. | Bjarkey Olsen Gunnarsdóttir. | Geir Jón Þórisson. |