Ferill 435. máls. Aðrar útgáfur af skjalinu: PDF - Word Perfect.
148. löggjafarþing 2017–2018.
Þingskjal 888 — 435. mál.
Svar
sjávarútvegs- og landbúnaðarráðherra við fyrirspurn frá Bryndísi Haraldsdóttur um Einangrunarstöðina í Reykjanesbæ.
1. Hver er og hefur verið meðalbiðtími fyrir gæludýr í Einangrunarstöðina í Reykjanesbæ síðustu þrjú ár?
Samkvæmt upplýsingum sem ráðuneytið aflaði hjá Einangrunarstöðinni í Reykjanesbæ er meðalbiðtími 4–6 mánuðir, eftir því hvernig hann er metinn.
2. Telur ráðherra ástæðu til að bregðast með einhverjum hætti við löngum biðtíma eftir plássi í Einangrunarstöðina og ef svo er, hvernig?
Einangrunarstöðin er einkarekið fyrirtæki og ekki á færi ráðherra að hlutast til um rekstur hennar. Öllum er frjálst, að uppfylltum tilteknum skilyrðum, að byggja og reka slíkar stöðvar.
3. Hefur komið til skoðunar í ráðuneytinu að breyta fyrirkomulagi innflutnings á gæludýrum og taka t.d. upp evrópska gæludýrapassann?
Ráðuneytið er að láta vinna áhættumat fyrir innflutning á hundum og köttum. Til verksins var fenginn fyrrverandi yfirdýralæknir Danmerkur. Hann mun skila áhættumati á næstunni, sem verður m.a. lagt til grundvallar þegar metið verður hvort rétt sé að gera breytingar á gildandi fyrirkomulagi.