Ferill 511. máls. Aðrar útgáfur af skjalinu: PDF - Word Perfect.
148. löggjafarþing 2017–2018.
Þingskjal 1141 — 511. mál.
Svar
samgöngu- og sveitarstjórnarráðherra við fyrirspurn frá Birgi Þórarinssyni um umferðarlagabrot erlendra ferðamanna.
1. Hvað hyggst ráðherra gera til þess að koma í veg fyrir að erlendir ferðamenn, sem sektaðir hafa verið vegna umferðarlagabrota, fari úr landi án þess að fullnægjandi greiðslur á sektum hafi borist eða fullnægjandi tryggingar fyrir greiðslu þeirra?
Ný umferðarlög eru í smíðum í ráðuneytinu, sbr. drög sem birt voru í samráðsgátt stjórnvalda í febrúar sl. Meðal nýmæla í frumvarpinu er hlutlæg ábyrgð á sektum vegna brota sem numin eru af sjálfvirkum löggæslumyndavélum og varða ekki punktum í ökuferilsskrá. Slíkt ákvæði er til þess fallið að auðvelda innheimtu sekta, m.a. þeirra sem lagðar eru á erlenda ferðamenn.
2. Í hverju felast fullnægjandi tryggingar að mati ráðherra og telur ráðherra að tryggingarnar hafi reynst fullnægjandi hingað til?
Sýslumenn annast innheimtu sekta og heyrir innheimta þeirra þar af leiðandi undir dómsmálaráðherra.
