Ferill 234. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 429 — 234. mál.
Svar
umhverfis- og auðlindaráðherra við fyrirspurn frá Karli Gauta Hjaltasyni um urðun úrgangs.
Fyrirspurnin hljóðar svo:
1. Hverjir eru urðunarstaðir úrgangs hér á landi? Óskað er eftir upplýsingum um alla urðunarstaði í skilningi reglugerðar um urðun úrgangs nr. 738/2003, sem og eldri urðunarstaði og staðsetningu þeirra, eins langt aftur og upplýsingar liggja fyrir um.
2. Á hvaða tímabili var úrgangur urðaður á hverjum stað skv. 1. tölul., hvert er magn úrgangs á hverjum stað og hver er frágangur hans?
3. Hvernig flokkast úrgangur urðaður á hverjum stað skv. 1. tölul., hvert er hættustig úrgangsins fyrir umhverfið og heilbrigði manna og dýra?
Urðun úrgangs er starfsleyfisskyld starfsemi, sbr. 14. gr. laga nr. 55/2003, um meðhöndlun úrgangs, og 6. gr. laga nr. 7/1998, um hollustuhætti og mengunarvarnir, og er Umhverfisstofnun útgefandi starfsleyfis. Svar við fyrirspurninni byggist því á upplýsingum frá Umhverfisstofnun um þá urðunarstaði sem starfa, eða störfuðu áður en þeim var lokað, á grundvelli starfsleyfis og felur í sér tæmandi yfirlit yfir þessa urðunarstaði. Öðru máli gegnir um gamla urðunarstaði, þ.e. þá sem voru í rekstri áður en starfsleyfisskylda kom til. Aðgengilegar og áreiðanlegar heimildir um slíka staði liggja ekki fyrir nema að takmörkuðu leyti. Skipulögð sorphreinsun og urðun úrgangs hefur tíðkast hér á landi í meira en öld. Í flestum tilfellum eru ekki til skráðar heimildir um staðsetningar gamalla urðunarstaða eða um þann úrgang sem þar var urðaður. Umfjöllunin um gamla urðunarstaði byggist á tveimur heimildum, annars vegar á yfirliti sem Umhverfisstofnun tók saman árið 2005 yfir mögulega menguð svæði, þ.m.t. gamla urðunarstaði, á landsvísu 1 og hins vegar á upplýsingum sem umhverfissvið Reykjavíkurborgar tók saman ári síðar um gamla urðunarstaði í Reykjavík. 2 Varðandi fyrri heimildina þá eru upplýsingar um gamla urðunarstaði misítarlegar eftir landshlutum og er rétt að gera ráð fyrir að yfirlitið sem á henni er byggt sé ekki tæmandi. Ef tekið er mið af því hvernig meðhöndlun úrgangs fór almennt fram áður fyrr má leiða líkur að því að urðun hafi að einhverju marki farið fram við flesta þéttbýlisstaði á landinu.
Varðandi magn þess úrgangs sem hefur verið urðað þá nær saga flestra urðunarstaða það langt aftur að upplýsingar um heildarmagn á hverjum stað eru ekki aðgengilegar með auðveldum hætti. Síðasta áratug eða svo hafa skyldur rekstraraðila urðunarstaða er varða umsóknir um starfsleyfi og skil þeirra á gögnum aukist umtalsvert, ásamt því sem rafræn umsýsla tölulegra upplýsinga um magn úrgangs var tekin upp fyrir fáeinum árum. Þar af leiðandi koma einungis fram í þessu svari upplýsingar um magn úrgangs sem urðað var árlega á urðunarstöðum með starfsleyfi á tímabilinu 2014–2018, þ.e. eftir að rafrænar skráningar hófust.
Urðunarstaðir á Íslandi, staðsetning þeirra, rekstrartímabil og frágangur.
Í töflu 1 er yfirlit yfir þá urðunarstaði sem eru með gilt starfsleyfi og upplýsingar um hvenær þeir fengu fyrst starfsleyfi, samkvæmt þeim upplýsingum sem aðgengilegar eru. Það gefur hugmynd um hvenær urðun á viðkomandi stað hófst en á sumum þessara urðunarstaða var þó hafinn rekstur öllu fyrr og því liggja ekki fyrir nákvæmar upplýsingar um rekstrartímabil. Það sama gildir um þá urðunarstaði sem voru með starfsleyfi á rekstrartíma en hefur nú verið lokað (tafla 2). Varðandi nákvæma staðsetningu starfandi urðunarstaða þá er hnitsetning þeirra gefin upp í þeim tilfellum þar sem þær upplýsingar eru aðgengilegar og nákvæm staðsetning urðunarstaða sem lokað hefur verið er gefin upp með landnúmeri viðkomandi landeignar. Við lokun gefur Umhverfisstofnun út skrifleg fyrirmæli til rekstraraðila um frágang og vöktun viðkomandi urðunarstaðar og er þeim þinglýst á viðeigandi landnúmer, sbr. 61. gr. laga um meðhöndlun úrgangs.
Tafla 1. Urðunarstaðir sem eru með gilt starfsleyfi.
Rekstraraðili | Staðsetning | Hnit | Fékk fyrst starfsleyfi | |
X (ISN93) | Y (ISN93) | |||
Bolungarvíkurkaupstaður | að Hóli | 31.8.2000 | ||
Borgarbyggð | Bjarnhólum | 360102 | 451984 | 9.7.2002 |
Borgarfjarðarhreppur | Brandsbölum | 739418 | 568594 | 31.8.2000 |
Byggðasamlagið Hula | Skógasandi | 475090 | 332612 | 7.1.2000 |
Dalabyggð | Höskuldsstöðum | 9.9.2015 | ||
Elkem Ísland ehf. | Grundartanga (eigin úrgangur) | 365255 | 430671 | 24.11.1998 |
Fjarðabyggð | Þernunesi | 741266 | 507688 | 27.2.2008 |
Fljótsdalshérað | Tjarnarlandi | 16.11.2001 | ||
Langanesbyggð | Bakkafirði | 5.9.2002 | ||
Mýrdalshreppur | við Uxafótarlæk | 501748 | 324486 | 7.1.2000 |
Norðurá bs. | Stekkjarvík | 441621 | 580285 | 26.11.2010 |
Norðurál Grundartangi ehf. | Grundartanga (eigin úrgangur) | 365420 | 430794 | 26.3.1997 |
Norðurþing | Laugardal | 574546 | 617914 | 24.11.1997 |
Norðurþing | Kópaskeri | 9.9.2002 | ||
Rio Tinto á Íslandi hf. | Straumsvík (eigin úrgangur) | 7.11.2005 | ||
Skaftárhreppur | Stjórnarsandi | 475090 | 332612 | 7.1.2000 |
SORPA bs. | Álfsnesi | 366625 | 412355 | 11.6.2001 |
Sorpsamlag Strandasýslu ehf. | Skeljavík | 377099 | 581129 | 15.5.2006 |
Sorpstöð Rangárvallasýslu bs. | Strönd | 690508 | 590017 | 13.12.2007 |
Sorpstöð Suðurlands bs. | Kirkjuferjuhjáleigu | 475090 | 332612 | 22.9.1998 |
Sorpurðun Vesturlands hf. | Fíflholtum, nýr urðunarstaður | 349952 | 469714 | 5.2.2014 |
Stykkishólmsbær | Ögri | 370296 | 514887 | 9.11.2006 |
Sveitarfélagið Hornafjörður | í landi Syðri-Fjarðar | 692966 | 428910 | 9.12.2002 |
Vopnafjarðarhreppur | Búðaröxl | 690508 | 590017 | 5.9.2002 |
Tafla 2. Urðunarstaðir sem voru með starfsleyfi en hefur nú verið lokað.
Rekstraraðili | Staðsetning | Landnúmer | Fékk fyrst starfsleyfi | Fyrirmæli um frágang og vöktun gefin út |
Akraneskaupstaður | við Berjadalsá | 172746 | 4.12.2002 | 13.11.2014 |
Akureyrarbær | Glerárdal | 220320 | 24.9.1999 | 13.8.2014 |
Blönduósbær | Draugagili | 221109 | 3.3.2005 | 9.7.2014 |
Bæjarveitur Vestmannaeyja | Bústaðagryfju | 221478 | 24.9.1999 | 26.3.2014 |
Breiðdalshreppur 3 | Heydalamelum | 31.8.2000 | Verða gefin út | |
Dalabyggð | Búðardal | 137556 | 9.7.2002 | 11.6.2014 |
Funi-Sorpbrennsla | Klofningi | 138618 | 24.9.1999 | 15.11.2012 |
Grundarfjarðarbær | Hrafnkelsstöðum | 136625 | 4.12.2002 | 5.12.2012 |
Húnaþing vestra | Syðri-Kárastöðum | 144501 | 27.7.2001 | 29.4.2015 |
Sveitarfélagið Skagaströnd | Neðri-Harrastöðum | 145864 | 3.3.2005 | 19.6.2014 |
Langanesbyggð | Þórshöfn | 221636 | 5.9.2002 | 23.4.2014 |
Sorpstöð Suðurlands bs. 4 | Kirkjuferjuhjáleigu | 174184 | 22.9.1998 | 13.5.2015 |
Sorpurðun Vesturlands hf. | Fíflholtum, eldri urðunarstaður | 135995 | 17.8.1998 | 11.6.2014 |
Sveitarfélagið Hornafjörður | Svínafelli | 160192, -95 og -96 | 4.12.2002 | 10.4.2013 |
Sveitarfélagið Skagafjörður | Skarðsmóum | 145958 | 7.12.1987 | 13.8.2014 |
Vesturbyggð | Vatnseyrarhlíð | 222306 | 18.11.2002 | 29.1.2015 |
Í töflu 3 er yfirlit yfir gamla urðunarstaði, þ.e. sem voru í rekstri áður en starfsleyfisskylda kom til. Ítarlegustu upplýsingarnar varða gamla urðunarstaði í Reykjavík og þar liggja jafnan fyrir upplýsingar um nákvæma staðsetningu og um rekstrartímabil. Upplýsingar um gamla urðunarstaði annars staðar á landinu eru ekki eins ítarlegar. Ekki liggja fyrir haldbærar upplýsingar um frágang allra þessara gömlu staða og gera má ráð fyrir að hann sé mismunandi. Í sumum tilfellum eru þessir staðir komnir undir byggð eða hafa verið nýttir undir starfsemi af einhverju tagi. Aðrir staðir eru afskekktir.
Tafla 3. Gamlir urðunarstaðir sem ekki höfðu starfsleyfi (yfirlitið er ekki tæmandi).
Staðsetning | Nánari staðsetning | Í notkun (u.þ.b.) |
Reykjavík | Selsvör við Ánanaust | 1900– 1940 |
Reykjavík | frá Grandavegi vestur að býlinu Eiði | 1940– 1954 |
Reykjavík | við Reykjavíkurtjörn og fyrir neðan Háskólann | 1900– 1928 |
Reykjavík | í Vatnsmýrinni fyrir neðan gamla Kennaraskólann | 1930– 1955 |
Reykjavík | Skólavörðuholti | 1900– 1928 |
Reykjavík | við Skúlagötu, neðan Barónsstígs | 1930– 1950 |
Reykjavík | við sorpbrennslu við Stórhöfða | 1953– 1967 |
Reykjavík | sorpeyðingarstöðinni við Stórhöfða | 1958– 1978 |
Reykjavík | við Fossaleyni | 1958– 1965 |
Reykjavík | í Stekkjabrekku við Vesturlandsveg | 1958– 1967 |
Reykjavík | í Ártúni | 1958– 1968 |
Reykjavík | Geirsnefi | 1960– 1967 |
Reykjavík | Keldnaholti | 1960– 1973 |
Reykjavík | við loftskeytastöð í Gufunesi | 1960– 1970 |
Reykjavík | Gufuneshaugum | 1967– 1991 |
Reykjavík | við Kirkjusand | Um og eftir 1967 |
Hafnarfjörður | Hamranesi | |
Sunnan Reykjavíkur | ||
Reykjanes | Stafnesi | 1980–2002 |
Reykjanes | Miðnesheiði | |
Reykjanesbær | við Hafnaveg | |
Ölfus | við Selfoss | |
Egilsstaðir | Þórsnesi | |
Reyðarfjörður | ||
Eskifjörður | Hólmanesi | |
Neskaupstaður | ofan við gamla frystihúsið | |
Seyðisfjörður | við gamla brennarann | |
Breiðdalsvík | við gamla brennarann | |
Hornafjörður | Fjárhúsavík | |
Ólafsfjörður | ||
Mývatnssveit | við Kísiliðju | |
Mývatnssveit | norðan Kísiliðju | |
Raufarhöfn | ||
Akureyri (tveir gamlir urðunarstaðir) | ||
Dalvík | ||
Grenivík | ||
Hrísey | ||
Húsavík | Saltvík | |
Þingeyjarsveit | Húsabakka, Aðaldal | |
Þingeyjarsveit | Kvígindisdal | |
Heiðarfjall | ||
Mosfellsbær | nærri vegamótum Hafravatnsvegar og Úlfarsfellsvegar |
Magn og hættustig úrgangs sem urðaður hefur verið á hverjum urðunarstað.
Eins og áður hefur komið fram liggja ekki fyrir aðgengilegar upplýsingar um það heildarmagn sem urðað hefur verið á hverjum urðunarstað. Í töflu 4 er hins vegar að finna upplýsingar um magn þess úrgangs sem urðaður var á tímabilinu 2014–2018 á hverjum þeirra urðunarstaða sem eru starfandi (tafla 1). Á þessu tímabili fór ekki fram urðun á þeim stöðum sem hefur verið lokað (tafla 2), að undanskildum urðunarstað Breiðdalshrepps þar sem voru urðuð samtals 435 tonn á tímabilinu og urðunarstað Húnaþings vestra þar sem urðuð voru 1.067 tonn árið 2014.
Þeir urðunarstaðir sem eru starfandi og hafa starfsleyfi til að taka á móti úrgangi frá öðrum hafa allir heimild til að taka annaðhvort á móti almennum úrgangi eða óvirkum úrgangi til urðunar. Almennur úrgangur er allur úrgangur annar en spilliefni og óvirkur úrgangur er úrgangur sem breytist ekki verulega líf-, efna- eða eðlisfræðilega og hefur ekki skaðleg áhrif á umhverfið, t.d. múrbrot, gler og uppmokstur. Dæmi um almennan úrgang er sorp frá heimilum og úrgangur frá atvinnustarfsemi sem ekki telst vera spilliefni. Almennur úrgangur hefur að jafnaði meiri áhrif á umhverfið en óvirkur úrgangur en telst samt sem áður hættulítill. Þessir urðunarstaðir eru því almennt ekki ætlaðir til urðunar á spilliefnum. Það sama gildir um þá urðunarstaði sem voru með starfsleyfi en lokað hefur verið, þ.e. þeir tóku annað hvort á móti almennum úrgangi eða óvirkum úrgangi. Í gildi eru reglur sem kveða á um mat á hættulegum eiginleikum úrgangs og í hvaða tilfellum flokka eigi úrgang sem spilliefni, sbr. reglugerð nr. 1040/2016 um skrá yfir úrgang og mat á hættulegum eiginleikum úrgangs. Vakin er athygli á því að þótt urðunarstöðum fyrir almennan úrgang sé almennt ekki heimilt að taka á móti spilliefnum þá er þeim heimilt, að uppfylltum tilteknum skilyrðum, að taka við spilliefnum sem flokkast sem stöðug og óvirk, sbr. 4. mgr. 6. gr. reglugerðar nr. 738/2003 um urðun úrgangs. Það heyrir til undantekninga að þessi heimild eigi við. Jafnframt er athygli vakin á að starfandi urðunarstaðir eru undir reglubundnu eftirliti Umhverfisstofnunar og við þá fer jafnan fram reglubundin vöktun á losun mengunarefna, svo sem í yfirborðsvatn eða í grunnvatn. Reglubundin vöktun fer líka fram við þá urðunarstaði sem hefur verið lokað, svo lengi sem telja má að mengunarhætta stafi af þeim.
Þrír af þeim urðunarstöðum sem eru starfandi eru ekki hefðbundnir urðunarstaðir, heldur svokallaðar flæðigryfjur. Tvær þessara gryfja eru staðsettar á Grundartanga og ein í Straumsvík og eru þær sérstaklega útbúnar til förgunar á eigin úrgangi sem fellur til við framleiðslustarfsemi þeirra fyrirtækja sem standa að rekstri þeirra. Þeim er ekki heimilt að taka við úrgangi frá öðrum til förgunar. Í starfsleyfum fyrirtækjanna er tiltekið hvaða úrgangi er heimilt að farga en í sumum tilfellum er um að ræða spilliefni. Líkt og aðrir starfandi urðunarstaðir þá eru þessir þrír staðir undir reglubundnu eftirliti Umhverfisstofnunar og við þá fer fram reglubundin vöktun á mengunarefnum í sjó, sjávarseti og í kræklingi.
Varðandi þá gömlu urðunarstaði sem staðsettir eru í Reykjavík þá eru þeir misstórir og hefur magn úrgangs á hverjum þeirra verið áætlað frá nokkrum tugum til tugþúsunda tonna. Talið er að á flestum þessara urðunarstaða hafi verið urðaður hættulítill úrgangur en á nokkrum þeirra eru taldar miklar líkur á að urðuð hafi verið spilliefni. Ekki liggja fyrir upplýsingar um stærð gamalla urðunarstaða annars staðar á landinu en þeir voru að líkindum flestir ætlaðir til urðunar á hættulitlum úrgangi. Líkt og í Reykjavík verður þó að teljast líklegt að á a.m.k. sumum þeirra hafi jafnframt verið urðuð spilliefni.
Tafla 4. Magn úrgangs sem urðaður var 2014–2018.
Magn [tonn] | ||||||
Rekstraraðili | Staðsetning | 2018 | 2017 | 2016 | 2015 | 2014 |
Bolungarvíkurkaupstaður | að Hóli | 45 | 48 | 25 | 7 | 236 |
Borgarbyggð | Bjarnhólum | 18 | 16 | 3 | 16 | 0 |
Borgarfjarðarhreppur | Brandsbölum | 139 | 49 | 162 | 75 | 153 |
Byggðasamlagið Hula | Skógasandi | 537 | 395 | 577 | 390 | 419 |
Dalabyggð | Höskuldsstöðum | 31 | 68 | 9 | 0 | |
Elkem Ísland ehf. | Grundartanga | 4137 | 3367 | 3558 | 5340 | 3538 |
Fjarðabyggð | Þernunesi | 1735 | 2824 | 2991 | 2164 | 2075 |
Fljótsdalshérað | Tjarnarlandi | 2214 | 1537 | 1504 | 1434 | 1341 |
Langanesbyggð | Bakkafirði | 197 | 87 | 0 | 0 | |
Mýrdalshreppur | við Uxafótarlæk | 537 | 0 | 0 | 0 | |
Norðurá bs. | Stekkjarvík | 18410 | 20523 | 20241 | 18267 | 16088 |
Norðurál Grundartangi ehf. | Grundartanga | 11052 | 10809 | 24199 | 11644 | 7537 |
Norðurþing | Laugardal | 536 | 616 | 593 | 503 | 0 |
Norðurþing | Kópaskeri | |||||
Rio Tinto á Íslandi hf. | Straumsvík | 4387 | 4675 | 20817 | 27278 | 4411 |
Skaftárhreppur | Stjórnarsandi | 197 | 198 | 197 | 198 | 181 |
SORPA bs. | Álfsnesi | 147196 | 141688 | 122540 | 108546 | 102493 |
Sorpsamlag Strandasýslu ehf. | Skeljavík | 245 | 50 | 314 | 48 | 344 |
Sorpstöð Rangárvallasýslu bs. | Strönd | 1788 | 1820 | 1529 | 1737 | 2089 |
Sorpstöð Suðurlands bs. | Kirkjuferjuhjáleigu | 0 | 0 | 0 | 0 | 0 |
Sorpurðun Vesturlands hf. | Fíflholtum, nýr urðunarstaður | 17573 | 14168 | 12586 | 11225 | 11462 |
Stykkishólmsbær | Ögri | 228 | 185 | 0 | 30 | 188 |
Sveitarfélagið Hornafjörður | í landi Syðri-Fjarðar | 3312 | 2782 | 1903 | 2257 | 2103 |
Vopnafjarðarhreppur | Búðaröxl | 786 | 909 | 1237 | 1048 | 576 |
1 Umhverfisstofnun (2005). Report on Soil Protection and Remediation of Contaminated Sites in Iceland. A preliminary study.
2 Umhverfissvið Reykjavíkurborgar (2006). Gamlir urðunarstaðir í Reykjavík.
3 Starfsleyfi urðunarstaðarins í Breiðdalshreppi er fallið úr gildi og hefur rekstraraðili hafið lokunarferli.
4 Urðunarstaðnum að Kirkjuferjuhjáleigu hefur verið lokað og fyrirmæli um frágang og vöktun gefin út en starfsleyfi staðarins er enn í gildi.