Ferill 306. máls. Aðrar útgáfur af skjalinu: PDF - Word Perfect.
151. löggjafarþing 2020–2021.
Þingskjal 633 — 306. mál.
Svar
ferðamála-, iðnaðar- og nýsköpunarráðherra við fyrirspurn frá Guðmundi Inga Kristinssyni um notkun jarðefnaeldsneytis.
Fyrirspurnin hljóðar svo:
Hve mikið er notað af kolum, olíu og öðru jarðefnaeldsneyti árlega, í stað annarra orkugjafa, við iðnað, rafmagnsframleiðslu og húshitun?
Leitað var gagna hjá Orkustofnun og Umhverfisstofnun til að svara fyrirspurninni. Í meðfylgjandi töflu 1 má sjá gögn sem Orkustofnun aflar frá söluaðilum eldsneytis á Íslandi er varða sölu á olíu og gasi til nota í iðnaði. Til iðnaðar telst byggingariðnaður, landbúnaður, fiskimjölsiðnaður, efnaiðnaður, steinefnaiðnaður, framleiðsla og vinnsla málma, matvæla- og drykkjarvöruiðnaður ásamt öðrum óflokkuðum iðnaði. Nær öll koks- og kolanotkun sem er notuð í stóriðju telst ekki til orkunotkunar því kolin þjóna þar hlutverki kolefnisgjafa í efnahvörfum í iðnaðarferlum. Gögn um koks- og kolanotkun í töflu 1 koma frá Umhverfisstofnun.
Tafla 1. Árleg notkun olíu, gass, kola og koks í iðnaði (tonn).
Iðnaður | 2016 | 2017 | 2018 | 2019 | 2016–2019 |
Olía [tonn] | 56.770 | 48.342 | 40.520 | 30.549 | 176.181 |
Gas [tonn] | 867 | 681 | 1.047 | 1.522 | 4.117 |
Kol og koks [tonn] | 149.188 | 156.804 | 166.249 | 166.945 | 639.186 |
Í töflu 2 sjást gögn sem aflað er frá söluaðilum eldsneytis á Íslandi um olíunotkun vegna orkuvinnslu og húshitunar. Kol eru ekki notuð til rafmagnsframleiðslu eða húshitunar á Íslandi, né annað jarðefnaeldsneyti en olía. Notkunarflokkum var breytt árið 2019 og gerð var krafa um ítarlegri skiptingu.
Tafla 2. Árleg notkun olíu til rafmagnsframleiðslu, húshitunar og fleiri þátta (tonn).
Orka | 2016 | 2017 | 2018 | 2019 | 2016–2019 |
Olía samtals [tonn] | 1.793 | 2.989 | 1.746 | 2.514 | 9.042 |
Orkuvinnsla | 726 | 695 | 742 | – | 2.163 |
Húshitun og sundlaugar | 1.067 | 2.294 | 1.004 | – | 4.365 |
Húshitun | – | – | – | 660 | 660 |
Sundlaugar | – | – | – | 291 | 291 |
Fjarvarmaveitur | – | – | – | 326 | 326 |
Raforkuframleiðsla | – | – | – | 1.237 | 1.237 |