Ferill 712. máls. Aðrar útgáfur af skjalinu: PDF - Word Perfect.
151. löggjafarþing 2020–2021.
Þingskjal 1785 — 712. mál.
3. umræða.
Nefndarálit með breytingartillögu
um frumvarp til laga um umhverfismat framkvæmda og áætlana.
Frá umhverfis- og samgöngunefnd.
Nefndin fjallaði um málið að nýju og tók til skoðunar vísanir til verndarsvæða í einstökum töluliðum í 1. viðauka. Nefndin áréttar að skv. 1. mgr. 19. gr. frumvarpsins, sbr. einnig aðfaraorð 1. viðauka, eru framkvæmdir í flokki B sem eru undir viðmiðunarmörkum í 1. viðauka tilkynningarskyldar ef þær eru staðsettar á verndarsvæði, þ.e. óháð stærðarmörkum. Því er almennt ekki þörf á að tilgreina sérstaklega við hvern tölulið í flokki B að framkvæmd sé tilkynningarskyld óháð umfangi ef hún er staðsett á verndarsvæði. Þrátt fyrir það er í nokkrum slíkum tilvikum í 1. viðauka frumvarpsins vísað til verndarsvæða. Samkvæmt upplýsingum frá ráðuneytinu var það gert til að tryggja skýrleika. Þannig eigi reglan um að framkvæmdir í flokki B séu tilkynningarskyldar óháð umfangi á verndarsvæðum við nema þar sem sérstaklega eru tilgreind sérstök skilyrði í viðkomandi tölulið. Það eigi til dæmis við í tölulið 10.16 þar sem tilgreint er að jarðstrengir séu tilkynningarskyldir óháð lengd ef þeir eru staðsettir á verndarsvæðum utan þéttbýlis. Jarðstrengir á verndarsvæðum í þéttbýli eru þannig ekki tilkynningarskyldir. Að beiðni nefndarinnar hefur ráðuneytið yfirfarið að nýju ákvæði 1. viðauka í þessu skyni. Niðurstaða þeirrar skoðunar er að einungis er talin vera þörf á að vísa sérstaklega til verndarsvæðis, þ.e. þrátt fyrir ákvæði 19. gr. og aðfaraorða 1. viðauka, í 2. málsl. töluliðar 10.16, 1. málsl. töluliðar 10.18, 2. málsl. töluliðar 11.05 og í töluliðum 12.03 og 12.05. Nefndin leggur til að vísun til verndarsvæða falli brott í öðrum tilvikum en þessum. Breytingin er tæknilegs eðlis og ekki ætlað að hafa efnisleg áhrif.
Að framansögðu virtu leggur nefndin til að frumvarpið verði samþykkt með eftirfarandi
BREYTINGU:
Við 1. viðauka.
a. Orðin „einnig óháð spennu ef staðsett á verndarsvæði“ í tölulið 10.16 falli brott.
b. Orðin „og óháð stærð á verndarsvæðum“ í tölulið 10.18 falli brott.
c. Orðin „verndarsvæði eða“ í tölulið 12.01 falli brott.
Guðjón S. Brjánsson var fjarverandi við afgreiðslu málsins.
Alþingi, 12. júní 2021.
Bergþór Ólason, form. |
Kolbeinn Óttarsson Proppé, frsm. |
Ari Trausti Guðmundsson. | |
Hanna Katrín Friðriksson. | Karl Gauti Hjaltason. | Líneik Anna Sævarsdóttir. | |
Njáll Trausti Friðbertsson. | Vilhjálmur Árnason. |