Ferill 208. máls. Aðrar útgáfur af skjalinu: PDF - Word Perfect.
157. löggjafarþing 2025–2026.
Þingskjal 354 — 208. mál.
Svar
fjármála- og efnahagsráðherra við fyrirspurn frá Þorgrími Sigmundssyni um húsaleigu framhaldsskóla.
1. Hvernig hefur innri húsaleiga framhaldsskóla landsins þróast frá árinu 2018, sundurliðað eftir skólum og árum?
a. Hafi hún hækkað, hvað skýrir hækkunina?
b. Hafi hún lækkað, hvað skýrir lækkunina?
Innleiðing laga um opinber fjármál fól í sér breytingar á reikningsskilum og umsýslu fasteigna í eigu ríkisins. Eftir gildistöku laganna bar að eignfæra og afskrifa fasteignir ríkisins á endingartíma þeirra. Megnið af því húsnæði sem nýtt er af ríkisreknum framhaldsskólum landsins er í eigu ríkisins og í miðlægri umsýslu Framkvæmdasýslunnar – Ríkiseigna (FSRE). Gengið var frá innleiðingu á markaðsleigu eða ígildi hennar sem tók gildi árið 2019. Fram að því innheimti FSRE húsaleigu af ríkisaðilum sem stóð aðeins undir hluta af fasteignakostnaði, þ.e. almennu viðhaldi fasteignanna, greiðslu trygginga og opinberra gjalda en ekki fjármagnskostnaði og afskriftum. Leiga á vegum ríkisins hafði fram að þessum breytingum verið mun lægri en sú sem greidd var fyrir sambærilegt húsnæði á almennum markaði. Sá munur sem var á leiguverði stofnana á almennum markaði og stofnana sem leigðu hjá ríkinu hafði leitt til þess að rekstrarkostnaður þeirra var ekki samanburðarhæfur. Leiga sem er langt undir markaðsverði sambærilegra eigna á sama markaðssvæði leiðir almennt til þess að hagræðingarhvatar í húsnæðismálum verða minni. Eitt af markmiðunum með þessum breytingum var að draga fram raunverulegan kostnað af því að veita opinbera þjónustu og stuðla að hvata til hagræðingar. Samræming á leigugreiðslum hjá ríkisstofnunum óháð því hvort starfsemin er rekin í ríkishúsnæði eða húsnæði í eigu einkaaðila er liður í þeirri viðleitni
Upptaka á markaðsleigu hafði ekki áhrif á heildarafkomu ríkissjóðs og þar sem um var að ræða breytingar á innra leigufyrirkomulagi ríkisins voru gerðar breytingar á fjárheimildum einstakra ríkisstofnana til samræmis við áformaða hækkun á leiguverði. Frá því að markaðsleigan var innleidd hefur leigufjárhæðin tekið breytingum í samræmi við almennar breytingar á vísitölu neysluverðs.
Í eftirfarandi töflu sem byggist á upplýsingum frá FSRE má sjá árlegar breytingar á leiguverði þess húsnæðis sem er í eigu ríkisins og umsjón FSRE til einstakra framhaldsskóla:
Hér er efni sem sést aðeins í pdf-skjalinu.
2. Hver hafa framlög ríkisins vegna húsaleigu verið til framhaldsskóla landsins frá árinu 2018, sundurliðað eftir skólum og árum?
3. Hver hafa heildarframlög til framhaldsskóla verið vegna húsaleigu frá árinu 2018, sundurliðað eftir árum?
Eftirfarandi tafla um fjárheimildir einstakra framhaldsskóla byggist á upplýsingum frá mennta- og barnamálaráðuneyti.
Hér er efni sem sést aðeins í pdf-skjalinu.
Í framangreindum töflum er ekki gerð grein fyrir leigu á þremur ríkisreknum framhaldsskólum, þ.e. Menntaskólanum á Tröllaskaga, Fjölbrautaskóla Snæfellinga og Framhaldsskólanum í A-Skaftafellssýslu, sökum þess að þeir eru ekki í húsnæði sem er í umsjón FSRE á vegum ríkisins. Þá er heldur ekki gerð grein fyrir leigukostnaði einkarekinna framhaldsskóla.
4. Eru leigufjárhæðir reiknaðar út frá meðalleigu á fermetra þar sem viðkomandi stofnun er staðsett eða er um eitt verð að ræða, reiknað út frá húsaleigu í Reykjavík?
Í spurningunni eru tilteknar tvær aðferðir við útreikninga á leigu sem hvorug á fyllilega við núverandi fyrirkomulag. Eftir að markaðsleiga eða ígildi hennar var tekin upp árið 2019 er leiga reiknuð út frá gæðum og staðsetningu viðkomandi eignar út frá skilgreindu leigumódeli hjá FSRE. Verðflokkar eru þar af leiðandi mismunandi eftir skilgreindum gæðaflokkum og áætluðu markaðsverði vegna staðsetningar.
