Fjárlög 2005.

Hæstv. forseti. Já, ég geri nú ráð fyrir því að við séum að reyna að fást við þessi fjárlög sem við erum að ræða almennt. Okkur greinir ekki mikið á um að það sé það sem við erum að tala um svona í heildina tekið. En svo vill til að í þessum fjárlögum er fullt af fjárveitingum og fjárlögin í heild sinni byggjast á uppsöfnuðum fjárveitingum í allar áttir. En af því að menn hafa valið þann kúrsinn að taka niður verklegar framkvæmdir í vegakerfinu sem ég álít að séu einar arðbærustu framkvæmdir sem við getum verið í þá spyr ég sérstaklega að því hvernig menn finna það út að það sé best fyrir framtíð okkar að skera niður þar frekar en annars staðar.

Þegar minnst er á bankana í þessu sambandi og að bankarnir séu að vara við þenslunni þá kasta menn náttúrlega steinum úr glerhúsi í því sambandi. Engir standa í jafnmiklum lánveitingum, deilandi fé út í þjóðfélagið, og bankakerfið nú til dags. Það var auðvitað að vonum að þeir töluðu sérstaklega um að menn þyrftu að beita aðhaldi.