Aukatekjur ríkissjóðs.

Virðulegi forseti. Ég mæli fyrir frumvarpi til laga um breytingu á lögum um aukatekjur ríkissjóðs, nr. 88/1991, með síðari breytingum. Hér eru sömu meðflutningsmenn mínir, hv. þingmenn sem voru meðflutningsmenn mínir á frumvarpinu sem ég kynnti áðan um Ríkisendurskoðun.

Þetta mál er sömuleiðis einfalt og engin ástæða til að hafa mörg orð um það. Með frumvarpinu er lagt til að gjöld fyrir skráningu félaga verði lækkuð, sem og gjald fyrir skráningu loftfars til atvinnuflugs. Lækkunin yrði mismikil eftir tegund þeirra félaga sem um ræðir en mest yrði hún fyrir skráningu hlutafélaga og samvinnufélaga. Þar mundi gjaldið lækka úr 150 þús. kr. í 40 þús. kr. Lækkun gjalda fyrir skráningu annarra félaga yrði minni. Skráningargjöld félaga eftir breytinguna yrðu þó aldrei hærri en 40 þús. kr. Þá mundi skráningargjald fyrir loftfar til atvinnuflugs lækka úr 60 þús. kr. í 40 þús. kr.

Alþjóðabankinn gefur út samanburð á því hversu mikla fyrirhöfn og fjármuni þarf til að stofna fyrirtæki eftir löndum. Þegar bornar eru saman aðstæður til stofnunar fyrirtækja í ýmsum nágranna- og samkeppnislöndum Íslands kemur í ljós að hér á landi er framkvæmdin nokkuð skilvirk og einföld, og er það mjög ánægjulegt. Hins vegar liggur fyrir að kostnaðurinn er hér hár í samanburði við þessi lönd. Nemur kostnaður við stofnun einkahlutafélags hér á landi um 3,7% af vergri landsframleiðslu á mann en er enginn í Danmörku, svo að dæmi sé tekið. Í Finnlandi telst kostnaðurinn vera 1,1%, í Svíþjóð 0,7% og 0,6% í Bandaríkjunum.

Fyrir skráningu hlutafélags og samvinnufélags hefur verið tekið gjald sem nemur nú 150 þús. kr. Fyrir skráningu einkahlutafélags er þessi fjárhæð 75 þús. kr. Gjald fyrir aðrar skráningar hefur verið allt að 75 þús. kr. Þá hefur umskráning einkahlutafélags í hlutafélag kostað 75 þús. kr.

Framangreind gjöld eru bein skattheimta og varða ekki sjálfa skráninguna. Kostnaði af skráningum fyrirtækja er mætt með skráningargjaldi sem kveðið er á um í reglugerð nr. 474/2003, um útgáfu kennitölu við skráningu í fyrirtækjaskrá, með stoð í lögum nr. 17/2003, um fyrirtækjaskrá.

Hár kostnaður við stofnun fyrirtækja er hindrun við uppbyggingu atvinnulífs og kemur mest niður á nýsköpun. Ekki er óvarlegt að ætla að svo há gjöld sem nefnd hafa verið hér hafi fælt einhverja frá stofnun t.d. einkahlutafélags. Það er bagalegt því að hlutafélagaformið er tvímælalaust æskilegra í atvinnurekstri en t.d. rekstur manns í eigin nafni. Með frumvarpinu er leitast við að ryðja úr vegi þessari hindrun og búa þannig betur í haginn fyrir væntanlegt athafnafólk og nýsköpunarstarf.

Nú er sá sem hér stendur alls ekki að tala um að ástandið hvað þetta varðar sé alvarlegt eða erfitt. Við þekkjum öll að við höfum náð gríðarlegum árangri í efnahagsmálum Íslendinga og við höfum gert það með markvissum hætti, þ.e. með því að losa tök ríkisins á efnahagslífinu, selja fyrirtæki og lækka skatta á hinum ýmsu sviðum. Það hlýtur hins vegar alltaf að vera markmið að gera enn betur, og þetta frumvarp er þess vegna til komið, til að gera fólki enn auðveldara en nú er að fara út í nýsköpun og atvinnurekstur, en eins og allir þekkja, virðulegi forseti, erum við með eitt hæsta, ef ekki hæsta, hlutfall fólks sem fer út í slíka frumkvöðlastarfsemi í heiminum. En við eigum alltaf að halda vöku okkar hvað það varðar og við verðum að hafa það í huga að það sem knýr áfram atvinnu í landinu er fyrst og fremst krafturinn í fólkinu. Sú samneysla sem við höfum er byggð á atvinnulífinu. Þess vegna eigum við aldrei að hætta að hugsa út leiðir til að efla nýsköpun, efla frjálst framtak og atvinnulífið hér í landinu.

Virðulegi forseti. Ég ætla ekki að hafa þessa ræðu lengri en legg til að málinu verði vísað til efnahags- og viðskiptanefndar.