Fjárlög 2006.
Virðulegur forseti. Varðandi framlög til háskólastigsins þá höfum við aukið mjög verulega framlög til háskólanna á síðustu árum. Ég hygg að það sé leitun að þjóðum sem hafa aukið jafnmikið framlög til háskólamenntunar undanfarin ár eins og við Íslendingar. Ef ég man rétt erum við í dag komin nálægt meðaltali innan OECD-ríkjanna í framlögum til háskólastigsins.
Hv. þingmaður nefndi þjóðir vestan hafs í þessu sambandi. Við vitum auðvitað að stór hluti tekna þessara skóla er í formi skólagjalda þannig að ég held að það sé mjög mikilvægt að við berum saman rétta hluti. Meginmálið er það að við höfum stóraukið framlög til háskólastigsins í landinu á síðustu árum og það er auðvitað það sem skiptir máli í mínum huga á þessari stundu.