aðgerðaáætlun til að styrkja stöðu barna og ungmenna.
Hæstv. forseti. Ég ætla ekki að verða við áskorun hæstv. ráðherra um að taka því rólega. Ég held að það sé mjög mikilvægt að sú stjórnarandstaða sem er hér á þingi veiti núverandi stjórn aðhald og ég vona að hæstv. ráðherra fari ekki að taka því rólega á þeim mánuðum sem fram undan eru, enda efast ég ekki um að ærinn starfa er að hafa í félagsmálaráðuneytinu.
Hins vegar var dálítið merkilegur tónn sem hæstv. ráðherra sendi núverandi félögum sínum í ríkisstjórninni sem átti aðild að ríkisstjórn með Framsóknarflokknum síðustu 12 ár. Það voru ekki hlýjar kveðjur en þetta er kannski í anda þess sem hefur viðgengist á þessum fyrstu tveimur vikum núverandi ríkisstjórnar að forustumenn flokkanna tala saman í fjölmiðlum. Þetta minnir dálítið á ástandið 1991–1995 og því fer þessi ríkisstjórn ekki neitt sérlega vel af stað. En hins vegar hef ég ekki neitt verið að slá út af borðinu einhverjar tillögur sem eru í þessu skjali. Það eru nefnilega engar kostnaðartillögur. Ég hef ekki slegið neitt út af borðinu. Það sem við höfum kallað eftir er hvað menn ætla sér að gera í málefnum barnabóta o.s.frv. Því miður eru engin svör en það hefur ekkert verið slegið út af borðinu, hæstv. forseti.