eftirlaun forseta Íslands, ráðherra, alþingismanna og hæstaréttardómara.
Herra forseti. Ég tek undir með hv. þingmanni, það er gott að við erum að hverfa frá þessu ógagnsæja forréttindakerfi sem við vorum í. En í gær ákvað hv. þingmaður að greiða atkvæði og velja sér lífeyrissjóð — og hann valdi þann besta sem til er í landinu, hann valdi A-deild Lífeyrissjóðs starfsmanna ríkisins. Ég spyr hv. þingmann: Hvers vegna í ósköpunum gerði hann það? 80% af kjósendum í landinu, og sennilega hærra hlutfall af kjósendum hv. þingmanns af því að það eru færri opinberir starfsmenn úti á landi en í Reykjavík, það er bara einu sinni þannig, því miður — er gert að greiða í lífeyrissjóði sem eru með miklu lakari lífeyrisrétt. Iðgjald atvinnurekandans er 8% í staðinn fyrir 11,5% í Lífeyrissjóði starfsmanna ríkisins, sem sennilega fer að hækka. Og hv. þingmaður valdi í gær besta lífeyrissjóðinn á meðan öðru fólki í landinu er gert að greiða í ákveðinn lífeyrissjóð og getur ekki valið eitt eða neitt.