skattlagning orkusölu.
Frú forseti. Ég heyri að það er viðkvæmt mál fyrir hv. þm. Einari Kristni Guðfinnssyni að rifja það upp að hann studdi þau raforkulög sem innleidd voru og hafa í för með sér þá mismunun sem við verðum að þola gagnvart atvinnulífi, byggð og búsetu í landinu.
Varðandi það að leggja skatt á raforkuna, eins og hv. þingmaður minntist á, er það alveg rétt að það var kynnt í ríkisstjórn og ég vissi af því. Hins vegar á eftir að útfæra þessar tillögur eins og hæstv. fjármálaráðherra hefur greint frá. Ég lagði á það áherslu að horft yrði til þess að þetta yrði ekki íþyngjandi fyrir atvinnu, byggð og búsetu úti á landi þar sem áhrif af svona löguðu margfaldast yfirleitt. Það er alveg hárrétt … (Gripið fram í.) Við stöndum hins vegar frammi fyrir því gati sem er á fjárlögum, því efnahagshruni sem er afleiðing stjórnarstefnu Sjálfstæðisflokksins á undanförnum áratug og það er ekki sársaukalaust að leysa þar úr. En ég vil standa vörð um atvinnulífið á landsbyggðinni (Forseti hringir.) og vil að þar njóti menn jafnræðis.