Evrópustaðlar um malbik.
Virðulegi forseti. Ég vil þakka hv. þm. Guðlaugi Þór Þórðarsyni fyrir að taka upp þetta mikilvæga umferðaröryggismál.
Mig langar að nota tækifærið og spyrja hæstv. ráðherra að því hvort í þessum Evrópureglum um malbik séu einhver ákvæði um þann sið Vegagerðarinnar á Íslandi að láta ökumenn gerast vegagerðarmenn á sumrin. Þá á ég við þegar lagt er bundið slitlag og það er mikil lausamöl sem því fylgir og það kostulega álit Vegagerðarinnar að það sé heppilegt að ökumenn á Íslandi gerist valtarar yfir sumarmánuðina og skapa þar með stórhættu á þjóðvegum landsins. Það væri líka fróðlegt að vita hvort þessi undarlega árátta Vegagerðarinnar hafi ekki valdið töluvert mörgum slysum þegar menn renna til í mölinni og lenda jafnvel utan vega.