ríkisábyrgð á lántöku Tryggingarsjóðs innstæðueigenda og fjárfesta.
Frú forseti. Ég verð þó að segja að mér væri ekki alveg sama um það ef hér væri fundað fram yfir miðnætti. Það er 1. desember á morgun og ég tel að það væri ekki bragur á því að Alþingi væri að funda á þeim degi.
Ég vil nota tækifærið úr því að hæstv. fjármálaráðherra situr í salnum með okkur til að endurtaka tilboð okkar stjórnarandstöðunnar og hvetja forseta til að beita þeirri heimild sem forseti hefur í 2. mgr. 63. gr. þingskapalaganna og breyta dagskrá þessa fundar þannig að frá klukkan átta tökum við fyrir mjög mikilvægt mál, sem eru fjáraukalög, klárum þau, og síðan á miðvikudag þegar við komum aftur til þingfundar verði strax ráðist í það að ræða skattafrumvörp hæstv. fjármálaráðherra og þau afgreidd þannig að þau geti farið til nefndar, og við þá haldið áfram að ræða Icesave-málið ef það er enn á dagskrá. Forseti hefur heimild til að gera þetta. Forseti ber auðvitað ábyrgð gagnvart þinginu, ekki gagnvart ríkisstjórninni, (Forseti hringir.) og á að tryggja það að þingið sinni (Forseti hringir.) störfum sínum réttilega.