ríkisábyrgð á lántöku Tryggingarsjóðs innstæðueigenda og fjárfesta.
Frú forseti. Ég get tekið undir óskir hv. þm. Björgvins G. Sigurðssonar, um að umræðan verði bæði djúp og gagnleg, og mundi það strax hjálpa ef við sæjum á mælendaskrá einhverja af talsmönnum stjórnarliðsins, þá sem hafa borið þetta mál fram. Það mundi bæði dýpka umræðuna og gera hana gagnlegri.
Hitt vil ég nefna sérstaklega að það skiptir máli — til þess kannski að laða menn hingað inn í salinn og til þátttöku í umræðunni, ekki bara til þögullar setu — að forseti hagi fundarstörfum á þann veg að hægt sé að skipuleggja sig eftir þeim. Mig er farið að gruna að lítil þátttaka stjórnarliða í umræðunum eigi rætur sínar að rekja til þess að stjórn þingfunda hefur ekki verið sú sem við teljum æskilega. Töluvert skipulagsleysi hefur verið á fundum og er þetta ekki til þess fallið að kalla stjórnarliða í salinn, því miður. Það er augljóst.
Ég hvet forseta til (Forseti hringir.) að funda hið fyrsta með þingflokksformönnum og reyna að koma skikki á þinghaldið.