ríkisábyrgð á lántöku Tryggingarsjóðs innstæðueigenda og fjárfesta.
Forseti. Ég þakka hv. þm. Ásbirni Óttarssyni fyrir andsvarið. Ég tel að löngu sé kominn tími til, rétt eins og hv. þingmaður bendir á, að ræða um ábyrgð stjórnmálamanna í þessu máli, hvort sem það er fyrrverandi ríkisstjórn sem hrökklaðist hér frá völdum í ársbyrjun, eða þeir sem á undan henni gengu. Ég vildi óska þess að þeir sem þar voru á undan reyndu að axla ábyrgð eins og sú ríkisstjórn sem var hér á síðasta ári, í það minnsta annar ríkisstjórnarflokkurinn sem þá var, er að reyna að gera. En sá flokkur er að takast á við þetta mál, er að finna lausn og vill reyna að leiða málið til lykta hér á Alþingi. Það er ekki hægt að segja um fyrri ríkisstjórnarflokka sem hér hafa verið, því miður. Ég vil spyrja þingmanninn á móti: Hvaða ábyrgð telur hann sinn eigin flokk, Sjálfstæðisflokkinn, bera í þessu máli? Er kominn tími til þess að sá flokkur biðjist afsökunar á framgöngu sinni í málinu og axli sína ábyrgð í því? Eða er hann hreinlega yfir það hafinn? (Forseti hringir.)