fullgilding Árósasamningsins.

Forseti. Ég tek því af skilningi að þingmaðurinn vilji skoða málin áður en hann kveður upp einhvern lokadóm um þá aðferð sem hér er til lögð og kemur þá með aðrar í staðinn. Það er samt hægt að biðja um á þessu stigi að hv. þingmaður upplýsi um hvort hann er almennt hlynntur meginreglum um „actio popularis“, um þann almannarétt sem fram kemur í Árósasamningnum, eða ekki. Það voru fleiri ástæður en álit réttarfarsnefndar á sínum tíma sem stóðu í vegi fyrir því að Árósasamningurinn yrði fullgiltur meðan flokkur hv. þingmanns var í stjórn frá 1998, þ.e. þegar tillagan var lögð fram og Árósasamningurinn samþykktur, og til 2007 þegar flokkur hv. þingmanns fór úr stjórninni, en hv. þingmaður sat á þingi og studdi ríkisstjórnina lungann úr þessum tíma, frá árinu 2003 ef ég man rétt. Ég bið hv. þingmann að svara því ósköp einfaldlega: Er hann meðmæltur Árósasamningnum eða er hann kannski ósáttur við þann samning yfir höfuð?