staðfesting aðalskipulags.

Frú forseti. Hér er hreyft ákaflega mikilvægu máli er varðar sjálfsákvörðunarrétt sveitarfélaga um skipulagsvald og þær hugmyndir sem hafa tengst landsskipulagi og áætlunum ríkisstofnana og síðan meðferð hæstv. ráðherra á þessum tillögum. Núverandi hæstv. umhverfisráðherra hefur ítrekað lent í vandræðum með að staðfesta aðalskipulag sveitarfélaga, ekki síst á landsbyggðinni, er snerta mál sem í eru kannski fólgin einhver pólitísk ágreiningsefni er varða virkjanir og slíka hluti. Maður veltir fyrir sér hvort þetta mál verði næstu vandræði í samskiptum ríkisvaldsins og sveitarfélaganna, þ.e. að þær áætlanir sem til að mynda Vegagerðin, Landsnet eða aðrar slíkar stofnanir setja á laggirnar geti síðan farið að þvælast fyrir í samskiptum (Forseti hringir.) ríkisvaldsins og sveitarfélaganna. Það er ekki gott, þess vegna er mjög mikilvægt að þessu máli sé hreyft og við þurfum að finna á því einhverja lausn.