breytingartillaga og kostnaðarmat við 6. mál.

Virðulegi forseti. Mér finnst menn taka þessari umræðu af dálítið mikilli léttúð. Hér er verið að tala um sjálfa stjórnarskrána og ræða um afurð úr stjórnskipunar- og eftirlitsnefnd Alþingis og þá vil ég segja bara eins og er: Geta menn virkilega ekki gert betur en þetta? Er þetta það eina sem menn geta lagt fram með sér inn í þessa umræðu þegar við ræðum um sjálf grundvallarlög íslenska lýðveldisins og það er stjórnskipunar- og eftirlitsnefnd Alþingis sem er að störfum?

Það liggur fyrir að þessi tillaga er nánast ekki að neinu leyti í samræmi við þá tillögu sem upphaflega var lögð fram (Gripið fram í: Það er rangt.) nema að einu leyti eins og liggur fyrir í úrskurði forseta þingsins: Fyrirsögnin er sú sama. (Gripið fram í: Já.) Það sameinar þessar tvær tillögur. Þannig liggur algjörlega fyrir að þetta mál er á mjög gráu svæði, örugglega steingráu svæði, og einnig liggur fyrir að samkvæmt þingsköpum á að leggja fram prentað kostnaðarmat. Þetta kostnaðarmat hefur ekki komið fram og þó að (Forseti hringir.) hv. formaður nefndarinnar ætli að reyna að bjarga sér á hundavaði og harðahlaupum á eftir er það ekki í samræmi við þingsköp Alþingis. Það er kjarni málsins.