rannsókn á einkavæðingu banka.
Virðulegi forseti. Ég þakka hv. þingmanni fyrir þessa fyrirspurn. Ég hef áður lýst því yfir úr þessum ræðustól að ég tel mjög mikilvægt að við fáum allt upp á borðið sem gert hefur verið hér og tengist afdrifaríkum ákvörðunum fyrir hrun, við höfum það vel reifað að hluta til í rannsóknarskýrslunni, og að sjálfsögðu eftir hrun líka.
Ég rifja það upp fyrir hv. þingmanni að ég var mjög gagnrýninn á söluna á Vestiu og kom upp í þennan ræðustól til að vekja athygli á sjónarmiðum mínum í því efni þannig að það er ekki alveg rétt að ég hafi ekki lyft litla fingri til að vekja athygli á því að það þyrfti að velta við steinum í þeim efnum. Ég hef ekki breytt um skoðun í því efni, mun áfram tala fyrir því að hér sé fullt gegnsæi í þessum mikilvægu málum og að menn fái upplýsingar og geti áttað sig betur á því hvaða sjónarmið hafa ráðið ferðinni í þessum efnum.