neysluviðmið.

Virðulegi forseti. Varðandi síðara atriðið sem hv. þingmaður spurði út í, hvort við ættum einhliða að fella niður tolla til þess að Íslendingar gætu hugsanlega keypt ódýrari holl matvæli, getum við auðvitað spurt okkur að því sama til að mynda um íbúa Evrópusambandsins. Þeir setja nokkuð háa tolla á ýmsar vörur sem við seljum þeim, ættu þeir þá ekki líka einhliða að fella niður tolla af þeim, t.d. skyri og fiski? (Gripið fram í: Við styðjum það.)

Í samskiptum þjóða er farið yfir samninga um þessa tolla. Slíkir samningar eru í gangi og ég vænti þess að það skýrist fyrr en seinna hvort fram komi einhverjar breytingar í þá veru sem hv. þingmaður nefndi. Engu að síður hafa tollar lækkað á vörum sem er skortur á framleiðslu á hér innan lands, samanber nautakjöt. Tollur á hakki hefur til að mynda lækkað sennilega um 400–500 kr. til innkaups þrátt fyrir að einhverra hluta vegna hafi verð á sömu vöru hækkað um 15% á sama tíma. Er kannski rétt að beina spurningum um af hverju það hefur gerst til einhvers annars en stjórnvalda.

Varðandi fyrra atriðið kom hæstv. fjármálaráðherra hér fram með tekjufrumvarp og útgjaldafrumvarp á fyrstu dögum þingsins. Það hefur aldrei áður gerst í sögu þingsins að þau hafi komið svona snemma fram. Ráðherra hefur sjálfur nefnt að það hefði verið ágætt að fá heldur meiri tíma til þess að skoða þetta. Í staðinn hefur þingið fengið þennan möguleika. Hvað varðar nýlegar fréttir um neysluviðmið tel ég einboðið að þingnefndin sem fjalli um þetta mál taki það til ítarlegrar skoðunar. Komi í ljós að miðað sé við röng eða að einhverju leyti ekki fullnægjandi viðmið býst ég við að menn taki það til gagngerðrar endurskoðunar (Forseti hringir.) í meðförum þingsins og leysi úr því.

(Forseti (ÞorS): Forseti vill vekja athygli hv. þingmanna á því að klukka í púlti virkar ekki en forseti gerir sitt besta til að fylgjast með tíma.)