verslun með áfengi og tóbak o.fl.
Hæstv. forseti. Það er alveg rétt, mér finnst íhaldsemi góð og ég er íhaldsmaður, en ég er ekki afturhaldsmaður. Þar liggur kannski munurinn. Ég á voðalega erfitt með að sjá að við séum sérstök fyrirmynd annarra þjóða þegar kemur að brennivínsbrúki, ekki í minni tíð, ekki frá því að ég byrjaði að brúka það með ríkiseinokun alla tíð og með mjög takmörkuðu aðgengi á sínum tíma. Ég þurfti að bíða klukkutímum saman fyrir utan búðina við Snorrabraut og þetta var allt afgreitt yfir borðið.
Ætla menn að halda því fram í dag að ástandið hjá þjóðinni þegar kemur að alkóhóli sé verra núna en var fyrir 25 eða 35 árum? Ég segi nei. Ég held að við eigum að líta svo á að einstaklingurinn verði svolítið að bera ábyrgð á sjálfum sér og að hér sé ekki einokun á vöru (Forseti hringir.) sem er lögleg og eðlileg.