orð utanríkisráðherra um hagsmuni þingmanns.
Virðulegi forseti. Ég tek heils hugar undir með hv. þm. Lilju Rafneyju Magnúsdóttur og tel að þessi ummæli hæstv. utanríkisráðherra séu ámælisverð og verðskuldi afsökunarbeiðni. Að draga inn í umræðuna einhverja meinta fjölskylduhagsmuni af því þegar gamall sjómaður selur smábát eftir 50 ára langan starfsferil til að ljúka langri ævi og eiga eitthvað í ellinni, að draga það upp til að bera það saman við milljarðafjárhagshagsmuni eiginkonu hæstv. forsætisráðherra, sem hún geymir í yfirlýstu skattaskjóli á Tortólu, að líkja þessu tvennu saman er svo óþverralegt og ómerkilegt að ég minnist þess ekki að hafa heyrt annan eins samanburð í þinginu.
Auðvitað á hæstv. utanríkisráðherra að biðjast afsökunar á þessum ummælum sínum og það er (Forseti hringir.) ömurlegt þegar menn beita aðferðum sem þessum í opinberri umræðu í þinginu, (Forseti hringir.) að sverta heiðarlegt fólk lífs og látið með þessum hætti.