túlkun á fríverslunarsamningi EFTA og Marokkós.
Hæstv. forseti. Ég þakka hæstv. utanríkisráðherra fyrir afar skýrt og afdráttarlaust svar við spurningu minni.
Ég fagna því eindregið að Ísland túlki þennan fríverslunarsamning EFTA og Marokkós á sama hátt og norsk og svissnesk stjórnvöld hafa gert um að hann nái ekki til varnings frá hernumdum landsvæðum Vestur-Sahara.
Ég held að það skipti alveg gríðarlega miklu máli. Ég held að þetta gæti meira að segja skipt auknu máli inn í framtíðina núna því að því miður lítur ástandið í Vestur-Sahara verr út núna þessi missirin en gert hefur í ansi langan tíma með fordæmalausum brottrekstri Marokkóstjórnar á friðargæsluliðum Sameinuðu þjóðanna, sem er auðvitað alveg ótrúlegt og í rauninni alþjóðapólitískt mál sem ætti svo sannarlega skilið umfjöllun eitt og sér, sem mér finnst mikilvægt að nefna í þessu samhengi.
Einmitt út af þessu samhengi er svo mikilvægt að afstaða Íslands liggi alveg ljós fyrir. Það er hins vegar líka ljóst að á liðnum árum, það sést á innflutningsskýrslum, hefur talsverður innflutningur verið á sjávarafurðum frá Marokkó til Íslands. Í ljósi þess að helstu fiskimið Marokkós eru einmitt úti fyrir ströndum Vestur-Sahara þá tel ég mjög mikilvægt næsta skref að kannað verði mjög vel hvort uppruni þeirra afurða sé alveg á hreinu og ég boða það (Forseti hringir.) hér með að ég mun halda áfram að grennslast fyrir um það mál, hvort sem það verður (Forseti hringir.) í búningi fyrirspurna eða þingmála. Ég mun sem sagt fylgja því nánar eftir.