aðgerðir stjórnvalda gegn skattsvikum o.fl.
Hæstv. forseti. Ég þakka hv. þm. Valgerði Bjarnadóttur fyrir prýðisræðu. Ég ætla að virða ræðu hennar að því leytinu til að vera ekki að lengja umræðuna mikið þannig að ég kem hér bara í eitt andsvar. Ég ætla að fá að þakka henni sérstaklega fyrir hlý orð í garð framsögumanns málsins og líka störf nefndarinnar og þakka henni sömuleiðis samstarfið, virkilega ánægjulegt í mikilvægu máli. Af því að hv. þingmaður fór sérstaklega yfir takmörkun á frádrætti vaxtagjalda þá var það sameiginleg niðurstaða á endanum — þetta er svolítið álitamál, þetta er flókið mál við að eiga, enda hefur tekið langan tíma að koma þessu að í löggjöf og er virkilega ánægjulegt að það hafi loksins tekist eftir bæði þingmannamál og svo vinnu starfshóps sem hv. þingmaður vísaði til, en það eru auðvitað undantekningar í þessu — að fara mildilega inn þannig að við áttum okkur á því hvernig þetta komi út og fara kannski í fótspor þeirra þjóða sem hafa farið þessa leið og herða frekar reglurnar ef þurfa þykir.
Ég þakka hv. þingmanni fyrir samstarfið í nefndinni og góða ræðu.