staðan í stjórnmálunum í byrjun árs og verkefnin framundan.
Hæstv. forseti. Ég ætlaði að koma upp og ræða við hæstv. forsætisráðherra um sjúkrahúsmál eða spítala en ég ætla að halda áfram með það mál sem þeir sem hér hafa talað á undan hafa rætt um, þ.e. þá staðreynd að Hæstiréttur hefur tvisvar fellt dóm yfir hæstv. dómsmálaráðherra og nú spyr ég enn einu sinni — mér er alveg sama hvað það er, eitt er væntanlega nóg — hæstv. forsætisráðherra kemur sér hins vegar algjörlega undan því að ræða það mál, vísar nú á stjórnskipunar- og eftirlitsnefnd. Mig langar að spyrja hæstv. ráðherra í fyrsta lagi: Eru ráðherrar hafnir yfir lög? Þurfa ráðherrar ekki að fara að lögum landsins? Í öðru lagi: Ef dómur fellur á ráðherra, á hann að axla ábyrgð með einhverjum hætti? Ef ekki, af hverju ekki?
Ef það er þannig að ráðherrann á að axla ábyrgð, hvernig á hann þá að axla ábyrgð? Skiptir brotið máli? Skiptir máli hver á í hlut? Eða hvernig getur hæstv. ráðherra staðið hér frammi fyrir þingheimi og þjóðinni allri og látið í raun eins og það skipti ekki máli að dómsmálaráðherra í ríkisstjórn hennar hafi verið dæmdur af Hæstarétti?