ýmsar aðgerðir í samræmi við forsendur fjárlaga 2019.

Herra forseti. Það er ágætt að það liggur þá fyrir að hv. þingmaður telur rétt að tekjutengja barnabætur með einhverjum hætti. Þá er bara spurningin um hvar það er. Sama á við um vaxtabætur. Það hlýtur þá líka að þýða að horft er til annarra þátta, m.a. eignarinnar, nettóeignar, í vaxtabótakerfinu.

Það segir sig sjálft að þegar vaxtabætur lækka, þ.e. heildarvaxtabætur sem ríkissjóður greiðir, felur það í sér að hagur fólks er að batna, ef annað er óbreytt. Tekjur eru að aukast, skuldir eru að lækka, eignastaðan er að batna. Það ætti að kæta okkur hér í þessum sal vegna þess að það er merki um að við erum að ná árangri. Við erum að ná árangri í því að bæta hér lífskjör.

Það má líka hafa í huga, eins og hæstv. fjármálaráðherra benti á fyrr, að það þýðir ekki eingöngu að horfa til vaxtabótanna eða hversu há fjárhæð fer í þær. Það verður líka að taka inn í hvað búið er að gera hér og þær skattaívilnanir sem eru fólgnar í því að leyfa fólki að taka út séreignarsparnað og nýta hann til að byggja upp eigið fé í íbúðum. Þegar allt er tekið saman þá hjálpar þetta allt og hefur m.a. áhrif til að draga úr þörfinni á vaxtabótum síðar. Þetta er mjög skynsamleg aðferð og ég hygg að hv. þingmaður hljóti að geta glaðst yfir því þegar vel gengur; tekjur launafólks eru að hækka, eignarstaðan að batna, skuldir lækka og lífskjörin þar með.