störf þingsins.
Herra forseti. Lögreglan í landinu hefur sannarlega verið mikið til umfjöllunar að undanförnu. Óhætt er að segja að staðan sem þar er uppi sé með öllu fordæmalaus. Lögreglan er ein mikilvægasta stofnun í landinu og því er mikilvægt að vandað sé til verka þegar kemur að skipulagsmálum lögreglu.
Samkvæmt mælingum hefur lögreglan mælst með mjög mikið traust árum saman og verður ekki annað sagt en að hún hafi staðið undir því og það, eitt með öðru, hefur létt mjög öll störf lögreglu. Mikilvægt er að varðveita það traust. Við megum ekki leyfa okkur að málið sem nú er uppi verði þæft með því að taka undir þær raddir sem tala fyrir því að fara verði í viðamiklar og afdrifaríkar skipulagsbreytingar í lögreglunni. Það eru aðeins tæp fimm ár frá því að verulegar breytingar voru gerðar á umdæmum lögreglu þar sem þau voru stækkuð og þeim fækkað úr hálfum þriðja tug niður í níu, og um leið fór fram aðskilnaður lögreglu og verkefna sýslumanna, jafnframt því sem lögreglunáminu var breytt verulega. Nokkrum árum fyrr höfðu miklar skipulagsbreytingar átt sér stað. Að sögn formanns Landssambands lögreglumanna er breytingaþreyta mikil innan lögreglunnar og er ekki á það bætandi að sinni og e.t.v. er það ein orsökin fyrir þeim uppákomum sem við höfum orðið vitni að.
Annað er að verkefni sem hafa verið á höndum ríkislögreglustjóra hafa skarast á við mörg verkefni lögregluembættanna í landinu og er það ein ástæða ólgunnar. Ég tel að ekki séu nein efni til þess að ana út í skipulagsbreytingar hjá lögreglunni og alls ekki að fara í þær að lítt athuguðu máli. Allt niðurrifstal um lögreglu þjónar engum tilgangi nema þeim að rýra og minnka tiltrú á lögreglunni og menn verða að átta sig á ábyrgð sinni í þeim efnum. Það er mín skoðun að úrlausn þessa máls megi ekki dragast deginum lengur vegna þess að mestan skaða af því ber lögreglan í landinu og við megum ekki við því.
