fjáraukalög 2020.

Herra forseti. Ég þakka hæstv. ráðherra. Tímans vegna er erfitt að svara öllum þessum spurningum, ég skil það vel. Við verðum kannski að taka bara sérstaka umræðu um hallann á ríkissjóði og hvernig menn hafa hugsað sér að komast út úr honum þegar fram líða stundir. En ég vildi aðeins fara inn á einn lið á bls. 70 í fjáraukanum sem heitir útlendingamál. Þar kemur í ljós að það eigi að hækka fjárframlög til málaflokksins um 412,8 millj. kr. Þetta er verulega há upphæð, einungis 19,1 milljón er vegna Covid-áhrifa. Á öðrum ársfjórðungi 2020 voru umsóknir 20% færri miðað við árið þar áður á sama tímabili. Þrátt fyrir það er gert ráð fyrir að umsækjendur árið 2020 verði 90% af fjöldanum þannig að útgjöld til þessa málaflokks eru að aukast á sama tíma og umsækjendum er að fækka. Maður spyr sig, hæstv. ráðherra: Hvernig verður það á næsta ári þegar landið opnar? Er stefna þessa málaflokks hjá þessari ríkisstjórn bara opinn tékki?