opinber stuðningur við nýsköpun.
Forseti. Já, ég er hjartanlega sammála hv. þingmanni um það. Hér er einmitt verið að henda burtu því sem við höfum án þess að hafa hugmynd um hvað á að koma í staðinn. Þetta frumvarp er vísirinn að því hvað gæti komið í staðinn. Það er samt frekar augljóst að þetta er í rauninni mjög innihaldslítið frumvarp þegar allt kemur til alls um þær aðstæður sem verða á fyrstu stigum nýsköpunar í kjölfarið. Því fyrr því betra, því að aðstæðurnar eins og þær eru núna kalla einmitt á grunnnýsköpun og hugmyndirnar eru alveg fjöldamargar þarna úti.
Mig langar aðeins að tala um annað í frumvarpinu sem er umfangið á þessu stigi, sem er kannski vísisjóður o.s.frv. með Kríuna t.d., sem eru 100 milljónir á ári, heilar 100 milljónir. Eins og kom fram í umsögn Space Iceland er það á við eitt parhús á höfuðborgarsvæðinu á ári sem landsbyggðin er að keppast um að fá hlutdeild í. Hversu langt skilar það okkur á því stigi nýsköpunar í raun og veru? Það eru ekki mörg verkefni þegar allt kemur til alls, því að á þessu stigi nýsköpunar er hlutdeildin yfirleitt farin að kosta mun meira en hún gerir á allra fyrstu stigum. Það er annar galli á þessu frumvarpi að því ég tel. Vissulega er verið að setja eitthvað af stað en þetta eru svoddan smámolar að það verða í rauninni fleiri hungraðir eftir þetta. Þegar maður fær ekki nægilega mikið að borða verður vandamálið þeim mun umfangsmeira.
