breyting á ýmsum lögum vegna fjárlaga 2022.
Virðulegi forseti. Mig langar að þakka hv. þingmanni fyrir góða ræðu. Það er alltaf gaman og lærdómsríkt að heyra af reynslu fólks. Nú hefur hv. þingmaður setið hér á þingi lengur en ég og eflaust heyrt í mörgum öryrkjum sem lifa hreinlega við sárafátækt hér á landi. Þegar það fólk heyrir afsakanirnar sem ríkisstjórnin og stjórnmálamenn veita fyrir því af hverju ekkert er gert í þeirra málum get ég ímyndað mér að hv. alþingismaður finni fyrir mikilli reiði í þjóðfélaginu þegar kemur að þessum málum.
Nú er talað um að það þurfi að breyta kerfinu og mig langar að heyra frá hv. þingmanni: Hvaða atriði eru það sem ríkisstjórnin ætti að hafa í huga þegar hún er að byggja upp þetta nýja kerfi sem hún notar endalaust sem afsökun? Hvað þurfa þau að passa svo við lendum ekki í sömu fátæktargildrunum og sama ruglinu og við erum í í dag?
