breyting á ýmsum lögum vegna fjárlaga 2023.
Forseti. Ég þakka hv. þingmanni fyrir sína framsögu og fyrir farsælt samstarf í efnahags- og viðskiptanefnd og farsæla málamiðlun, svona bráðabirgðalendingu, í mjög mikilvægu viðskiptafrelsismáli sem við munum kannski ræða betur einhvern tímann á eftir.
Mig langar aðeins, í framhaldi af þeim orðaskiptum sem hér áttu sér stað, að benda á að Græna orkan, sem er samstarfsvettvangur atvinnulífs og stjórnvalda þegar kemur að orkuskiptum, hefur verulegar áhyggjur af þeim breytingum sem verið er að gera á skattlagningu ökutækja í þessum bandormi. Það var ekki brugðist við þeim athugasemdum og þeim áhyggjum og mér finnst það athyglisvert vegna þess að Græna orkan samanstendur m.a. af ráðuneytum og Orkustofnun. Annars langaði mig kannski að nýta þetta andsvar til að spyrja með aðeins almennari hætti um þá tekjuöflun sem ráðist er í í þessu frumvarpi. Nú er það þannig að í þessum fjárlagabandormi er boðað ákveðið aðhald, sem er eðlilegt á þessu stigi, þegar það er mikil þensla í hagkerfinu, gríðarlega hátt atvinnustig og mikil verðbólga. Það er bullandi hagvöxtur og það er bara eðlilegt að ráðast í ákveðið aðhald og gera það á tekjuhliðinni eins og boðað er. En sú leið sem hér er farin, aðaltekjuöflunaraðgerðin í þessum fjárlagabandormi, er ofsahækkun á krónutölugjöldum sem eru gjöld sem leggjast náttúrlega hlutfallslega þyngst á tekjulægri hópa. En það var líka í raun samdóma álit nær allra umsagnaraðila sem komu fyrir nefndina að þetta væri afskaplega óskilvirk leið til að beita sköttum til að sporna gegn þenslu. Þetta eru gjöld af því tagi að þau leka beint út í vísitölu neysluverðs þannig að til skamms tíma eru þau einmitt til þess fallin að ýfa upp verðbólgu. Mig langar að spyrja hv. formann efnahags- og viðskiptanefndar hvort það hafi í alvöru ekki verið nein önnur leið til að beita skattkerfinu gegn þenslu en þessar flötu og miklu krónutölugjaldahækkanir.
