útlendingar.
Frú forseti. Við eigum að virða alþjóðasáttmála sem við höfum undirritað. Þetta hafa bæði dómsmálaráðherra og hv. þingmenn stjórnarflokkanna sagt oftar en einu sinni. Það er akkúrat von mín að við virðum slíka sáttmála. En ég spyr mig og spyr hv. þingmenn stjórnarflokkanna, sem kannski eru hér einhvers staðar að hlusta: Hvað með flóttamannasamninginn? Telur ráðherra kannski að það ættu að vera aðrar skilgreiningar á því hvaða skilyrði fólk þarf að uppfylla til að vera flóttamenn en þau skilyrði sem eru í flóttamannasamningnum og í 37. og 38. gr. laga um útlendinga? Telur ráðherra kannski að það þurfi ekkert að hlusta á athugasemdir Flóttamannastofnunar Sameinuðu þjóðanna við frumvarpið? Flóttamannastofnun Sameinuðu þjóðanna er verndari flóttamannasamningsins og þegar verndari flóttamannasamningsins bendir á að eitthvað í frumvarpi að íslenskum lögum stangist á við flóttamannasamninginn, eigum við þá ekki að hlusta?
Frú forseti. Hvað með barnasáttmála Sameinuðu þjóðanna? Er virkilega bara í lagi að bíða eftir því að börn verði 18 ára og senda þau þá heim, börn sem komu hingað ein síns liðs, fylgdarlaus? Drengurinn sem var sendur um daginn til Grikklands einn síns liðs kom hingað til lands einn áður en hann varð 18 ára. Þá segir skýrt í barnasáttmála Sameinuðu þjóðanna að taka skuli sérstaklega á því máli. En hvað gerir ráðherra? Jú, hann segir Útlendingastofnun að bíða bara þangað til viðkomandi er orðinn 18 ára og senda hann þá heim. Er líka í lagi, eins og lagt er til í þessu frumvarpi, að taka ekki sérstakt tillit til sérstöðu barnanna, sér í lagi hvort þau eigi að líða fyrir gerðir foreldra sinna eða lögfræðinga sinna? Búið er að benda á að þetta sé ekki bara brot á barnasáttmála Sameinuðu þjóðanna heldur líka barnalögum. Ég spyr hæstv. barna- og menntamálaráðherra Ásmund Einar Daðason hvort hann ætli að láta það líðast að svona sé farið með börn á Íslandi? Það væri gaman að fá hæstv. barna- og menntamálaráðherra til að koma hingað og svara því.
Frú forseti. Hvað með mannréttindasáttmála Evrópu? Er bara í lagi að ráðherra skilgreini mannréttindi valkvætt eftir því hvernig við viljum túlka þau í hvert og eitt sinn? Er ekki búið að gera íslensk stjórnvöld hornreka með allt of mörg dæmi um léleg vinnubrögð? Þurfum við ekkert að fara eftir þessum alþjóðasáttmálum, frú forseti, eins og ráðherra segir eða stjórnarskránni? Það er greinilegt að hv. þingmenn stjórnarflokkanna telja eins og ráðherra að það þurfi hvorki að fara eftir þessum sáttmálum né stjórnarskrá vegna þess að þau eru ekki einu sinni til í að fá óháð álit unnið.
