Störf þingsins.

Herra forseti. Gistiúrræði fyrir flóttafólk klárast í þessari viku. Þetta kemur fram hjá aðgerðastjóra móttöku flóttafólks. Búið er að hreinsa upp leigumarkaðinn svo að flóttafólk fái húsnæði. Þetta hefur að sjálfsögðu mikil áhrif á leigumarkaðinn almennt og sérstaklega á ungt fólk sem býr hér og vill byrja sinn búskap með því að leigja.

Nú eru liðnir rétt rúmlega tveir mánuðir af árinu og fjöldi þeirra sem sótt hafa um hæli á Íslandi er kominn í 1.000. Meiri hlutinn er frá Venesúela, fleiri en frá hinu stríðshrjáða landi Úkraínu. Ísland er sérstaklega auglýst í Venesúela sem land með gott velferðarkerfi. Meginástæðan fyrir þessum mikla fjölda umsókna frá Venesúela er sú að við komuna til landsins fær fólk fjögurra ára dvalarleyfi með sömu réttindi í velferðarkerfinu og Íslendingar. Þetta vita þeir að sjálfsögðu sem kaupa sér farmiða til Íslands frá Venesúela. Þriggja manna nefnd, kærunefnd útlendingamála, hefur ákveðið að þannig skuli þetta vera.

En hvernig taka önnur lönd á umsóknum frá Venesúela? Noregur veitir engum frá Venesúela fjögurra ára vernd. Í janúar komu sjö umsóknir frá Venesúela til Noregs, á Íslandi voru þær 166. Í febrúar komu þrjár umsóknir til Noregs frá Venesúela, á Íslandi voru þær 238. Svíþjóð vísar um 80% allra umsókna frá Venesúela frá. Spánn neitaði 10.000 umsóknum frá Venesúela á síðasta ári og veitir engum fjögurra ára vernd.

Herra forseti. Í úrskurði kærunefndar um Venesúela segir m.a. að þar í landi sé skortur á hreinu vatni. Það eru 86 lönd með verra vatn en Venesúela. (Forseti hringir.) Þetta segir allt sem segja þarf um kærunefnd útlendingamála. Kærunefnd sem er í raun ríki í ríkinu, bindur stjórnvöld og lætur skattgreiðendur borga brúsann.