Orkuöryggi.

Virðulegi forseti. Raforkuöryggi og umræða um það á alltaf að vera á dagskrá. Landsvirkjun hefur gefið það út að eftirspurn eftir orku sé meiri en framboðið og að eftirspurn eigi ekki eftir að minnka á næstu áratugum. Þess sér alls staðar merki; orkuskipti, breytingar í atvinnuháttum og fjölgun íbúa. Á sama tíma glíma heilu landsvæðin við mikið orkuóöryggi. Þetta hefur áhrif á heildarmyndina líkt og þegar blóðflæði er lélegt til einhverra líkamshluta, þá er heilbrigði einstaklings í hættu. Hér er um að ræða þjóðaröryggismál. Raforkuskortur og ófullnægjandi raforkuöryggi skapar ekki bara óþægindi fyrir almenning heldur er einnig þess valdandi að atvinnutækifæri eru andvana fædd.

Það er lítið borð fyrir báru til að mæta slæmum vatnsárum. Þegar sú staða kemur upp verða þeir landshlutar sem búa við þröngan kost í enn verri stöðu. Hjá Orkubúi Vestfjarða voru brenndar á síðasta ári rúmar tvær milljónir lítra af olíu til að framleiða raforku þar sem þurfti að starta varaafli. Það er tíföldun á olíumagni frá fyrra ári. Það er ekki í sjónmáli næstu misserin að framleiðsla verði aukin eða að flutningskerfi verði eflt. Við höfum á sama tíma göfug markmið um að hætta alfarið notkun á jarðefnaeldsneyti. Við náum ekki markmiðum okkar án aðgerða. Við verðum að huga að alvöruvirkjunarkostum á Vestfjörðum eða bæta flutningsleiðina. Ný flutningsleið Vesturlínu kostar ríkið 15 milljarða auk mikillar umhverfisröskunar. Við höfum þann kost. Ef við tölum t.d. um Vatnsfjarðarvirkjun myndi hún efla raforkuöryggi á Vestfjörðum um 95%. Tengivirkið við Mjólká er mjög stutt þannig að það væri ekki vandamál. Við verðum að fara að huga að alvörulausnum til þess að bæta raforkuöryggi í heild um landið.