Störf þingsins.

Hæstv. forseti. Árið 2006, fyrir 17 árum, gaf mennta- og menningarmálaráðuneytið út lögbundna aðalnámskrá í listdansi og ákveðið var að fara í uppstokkun á skólakerfi listdansins. Gerð var skýr skipting á milli skólastiga og var ætlunin að færa listdansnám í svipað horf og tónlistarnám er varðaði kostnaðarskiptingu milli ríkis og sveitarfélaga. Lög um framkvæmd á greiðslufyrirkomulagi með náminu voru aldrei kláruð. Ríkið hefur greitt með framhaldsskólastiginu en sveitarfélögin greiða ekki með grunnnáminu, ekki enn. Listdansskólar hófu kennslu samkvæmt aðalnámskránni fyrir 17 árum með vilyrði í farteskinu frá þáverandi menntamálaráðherra um að fjárhagslegur stuðningur með grunnnámi listdansins kæmi fljótlega. Þau bíða enn 17 árum síðar, sex ráðherrum síðar. Sveitarfélögin styðja ekki við listdansskóla. Enginn stuðningur er til staðar vegna kennsluhúsnæðis eða leigu og enginn fjárstuðningur er frá sveitarfélögunum vegna kennslu grunnnámsins. Þau halda að sér höndum því að regluverk vantar og þá um leið hvaða fjármagn fylgir með grunnnáminu frá ríki til sveitarfélaga. Boltinn er því og hefur verið í menntamálaráðuneytinu.

Mikið misræmi og ójafnræði ríkir í fjárútlátum ríkis og sveitarfélaga til listnáms og er aðstöðumunur listgreina mjög mikill. Enginn þarf að fara í grafgötur með hversu vel hefur tekist til með tónlistarnám barna. Það hefur skilað sér í magnaðri tónlistarsköpun í landinu. Ójafnræðið bitnar á börnum og ungmennum. Mikilvægt er að skapa þeim jöfn tækifæri er kemur að lista- og tómstundastarfi óháð listgrein eða íþrótt. Grunnnám í listdansi er undirstaða framhaldsskólastigs, háskólastigs og atvinnumennsku í greininni.