athugasemdir varðandi fyrirhugaða þjóðaratkvæðagreiðslu um ESB.

Virðulegur forseti. Mig langar að taka undir orð kollega minna í stjórnarandstöðunni. Það er náttúrlega með ólíkindum að það sé þannig að hæstv. utanríkisráðherra hafi neitað að koma á fund utanríkismálanefndar í morgun og ræða þetta mikilvæga mál. Brot á 24. gr. þingskapalaga, segir hv. þm. Sigmundur Davíð Gunnlaugsson. Það er náttúrlega bara hryggilegt ef ráðamenn þjóðarinnar brjóta þingskapalög með þessum hætti. Þetta er risastórt mál og ég skil ekki hvers vegna hæstv. utanríkisráðherra sér ekki sóma sinn í því að mæta fyrir nefndina. Og af hverju var málið ekki sett í samráðsgátt? Af hverju var málið ekki sett í samráðsgátt? Það er stórundarlegt og mér hefur líka borist það til eyrna að hæstv. utanríkisráðherra muni mögulega koma seinna fyrir nefndina, væntanlega þá þegar þessi umræða er búin. Það er líka stórundarlegt. Það væri nú bara við hæfi að það yrði gerð frestun á þessum þingfundi hér í dag og utanríkismálanefnd kölluð saman þannig að hæstv. ráðherra gæti farið yfir málið með nefndinni.