14.04.1909
Neðri deild: -1. fundur, 21. löggjafarþing.
Sjá dálk 1478 í B-deild Alþingistíðinda. (2007)
56. mál, byggingarsjóður
Skúli Thoroddsen:
Eg tek í sama streng, sem háttv. 2. þm. Rvík. (M. Bl.), að ef deildin samþykkir þetta, þá er það sama, sem hún skori á stjórnina, að fremja lagabrot, og eg vil benda háttv. flutningsm. (B. Kr.) á það, að samkvæmt fyrirmælum laga 20. okt. 1905, er lóðin eign byggingarsjóðs Íslands. Stjórnin hefir því heimild til þess að selja hana með ákveðnu verði, 5 kr. feralin, en brestur heimild til þess að leigja hana, og ákvæðum gildandi laga verður eigi breytt með þingsályktun, heldur að eins með nýjum lögum. Þingdeildin hlýtur því, sóma síns vegna, að fella nefnda þingsályktunartillögu.
Eg er og háttv. 2. þingm. Rvík. (M. Bl.) sammála um það, að menn mundu koma í stór-hópum og beiðast þess, að verða hins sama aðnjótandi, ef héraðslækninum væri leigð hin umbeðna lóð, og ekki sízt mundu ýmsir embættismanna í Reykjavík þá þykjast eiga tilkall til hins sama, t. d. bæjarfógeti, og yrði þá örðugra að synja.
Þingsályktunartillagan fer og fram á það, að baka byggingarsjóði mjög mikið fjártjón, þar sem vextir af andvirði lóðarinnar, væri hún seld á 5 kr. feralinin, eins og gildandi lög áskilja, mundu þótt rentan væri að eins reiknuð 4% nema 200 kr. árlega, og næmi þá tapið, þar sem tillagan gerir að eins ráð fyrir 100 kr. eftirgjaldi, hundrað krónum á hverju ári, og mundi sú upphæð með vöxtum og vaxtavöxtum í 99 ár skifta mörgum tugum þúsunda, og yrði það því ekkert smáræði, sem héraðslækninum yrði gefið á þennan hátt, og færi því bezt á því, að háttv. flutningsm. (B. Kr.) tæki tillöguna aftur, en að öðrum kosti á deildin að sjálfsögðu að fella hana.