12.04.1933
Neðri deild: 51. fundur, 46. löggjafarþing.
Sjá dálk 1686 í B-deild Alþingistíðinda. (1980)

90. mál, vitagjald

Frsm. (Ólafur Thors):

Ég gat ekki verið viðstaddur, þegar þetta mál var til 2. umr., af því að ég var þá ásamt hv. þm. Str. boðaður á bændafundinn til umr. um gengismálið, en hv. formaður n. tók þá að sér framsögu þessa frv. Sé ég enga ástæðu til að endurtaka þau rök, sem hann flutti þá fram um málið. Ég vil aðeins skýra frá því, að n. hefir borið fram brtt., sem er aðeins leiðrétting, af því að n. hafði láðst í nál. við 2. umr. að athuga, að í frv. þurfti að breyta tilvitnunum í l. um vitagjald, sem eru frá 1919, en ekki frá 1911. Ég geri ráð fyrir, að efnishlið málsins hafi verið rædd við 2. umr., og vil ég því láta þessi fáu orð nægja og vænti, að frv. megi ganga til Ed.