Ferill 952. máls. Aðrar útgáfur af skjalinu: PDF - Word Perfect.

153. löggjafarþing 2022–2023.
Þingskjal 2100  —  952. mál.
2. umræða.


Breytingartillaga


við frumvarp til laga um breytingu á lögum um virðisaukaskatt, lögum um skyldutryggingu lífeyrisréttinda og starfsemi lífeyrissjóða og lögum um tekjuskatt (eftirlitsheimildir, endurgreiðsla og séreignarsparnaður).

Frá Jóhanni Páli Jóhannssyni.


     1.      Á undan 8. gr. komi tvær nýjar greinar, svohljóðandi:
                  a.      (8. gr.)
                      Í stað hlutfallstölunnar „22%“ í 1. málsl. 3. mgr. 66. gr. laganna kemur: 25%.
                  b.      (9. gr.)
                      Í stað fjárhæðanna „7.500.000 kr.“ og „12.000.000 kr.“ í 4. mgr. ákvæðis til bráðabirgða XLI í lögunum kemur: 10.000.000 kr.; og: 16.000.000 kr.
     2.      Á eftir 8. gr. komi ný grein, svohljóðandi:
                 Við lögin bætist nýtt ákvæði til bráðabirgða, svohljóðandi:
                 Árið 2023 skal ákvarða mönnum sérstakan vaxtabótaauka. Vaxtabótaauki skal greiddur að lokinni álagningu opinberra gjalda, í síðasta lagi 1. ágúst, og miðast við tekjur og vaxtagjöld viðkomandi tekjuárs. Vaxtabótaauki reiknast með eftirfarandi hætti:
              1.      Stofn vaxtabótaauka skal vera 20% af vaxtagjöldum vegna lána sem tekin hafa verið vegna kaupa eða byggingar á íbúðarhúsnæði til eigin nota. Hjá þeim sem skattskyldir eru hluta úr ári vegna brottflutnings á tekjuárinu skal miða við skuldastöðu eins og hún var fyrir brottflutning.
              2.      Frá stofninum skal draga fjárhæð sem svarar til 4% af tekjuskattsstofni.
              3.      Vaxtabótaauki skerðist hlutfallslega fari eignir skv. 72. gr., að frádregnum skuldum skv. 1. mgr. 75. gr., fram úr 12.000.000 kr. hjá einstaklingi og 20.000.000 kr. hjá einstæðu foreldri og hjónum eða sambýlisfólki uns hún fellur niður við tvöfalda þá fjárhæð.
              4.      Vaxtabótaauki getur aldrei verið hærri en 200.000 kr. á ári fyrir hvern mann og 350.000 kr. á ári fyrir einstætt foreldri og hjón eða sambýlisfólk sem uppfyllir skilyrði fyrir samsköttun, sbr. 3. mgr. 62. gr., í lok tekjuárs. Hámark vaxtabótaauka hjá þeim sem skattskyldir eru skv. 1. gr. hluta úr ári ákvarðast í hlutfalli við dvalartíma á árinu.
              5.      Um rétt til vaxtabótaauka gilda að öðru leyti ákvæði B-liðar 68. gr. um vaxtabætur eftir því sem við á.

Greinargerð.

    Í breytingartillögu þessari er lagt til að heimili fái greiddan sérstakan vaxtabótaauka sumarið 2023. Stuðningurinn verði eigna- og tekjutengdur og veittur í formi eingreiðslu sem getur mest orðið 200.000 kr. fyrir einstakling og 350.000 kr. fyrir hjón eða sambýlisfólk og einstæð foreldri. Grunnur vaxtabótaaukans reiknast sem 25% af vaxtagjöldum vegna íbúðarhúsnæðis til eigin nota en frá honum dragast 4% af tekjuskattsstofni. Þá skerðist vaxtabótaaukinn hlutfallslega fari eignir að frádregnum skuldum fram úr 12 m.kr. hjá einstaklingi og 20 m.kr. hjá hjónum og sambýlisfólki og fellur niður við tvöfalda þá fjárhæð. Fjármálaráð hefur kallað eftir „markvissum tilfærslum til þeirra sem bæði eru skuldsettir og tekjulágir og ráða þannig illa við núverandi aðstæður“. Reiknireglur vaxtabótaaukans tryggja að stuðningurinn renni einvörðungu til íbúðareigenda í neðri hluta tekjustigans og ekki til heimila með sterka eiginfjárstöðu.
    Að auki er lagt til að eignaskerðingarmörk vaxtabóta hækki um 33% á næsta ári en eignamörkin hafa dregist langt aftur úr þróun fasteignaverðs á undanförnum árum.
    Tillögurnar tvær eru að fullu fjármagnaðar með hækkun fjármagnstekjuskatts úr 22% í 25%. Samkvæmt útreikningum fjármála- og efnahagsráðuneytisins skilar slík hækkun á bilinu 4–5 ma.kr. í ríkissjóð. Vegna frítekjumarks af vaxtatekjum og tekjum af hlutabréfaeign lendir hækkun skattprósentunnar nær einvörðungu á tekjuhæstu 10% landsmanna.